پاکستان کی خواتین کرکٹ ٹیم کو آئی سی سی ویمنز ورلڈ کپ میں سیمی فائنلز کی دوڑ میں رہنا ہے تو آج تاریخ رقم کرنی پڑے گی۔
آج پاکستان کا مقابلہ ٹورنامنٹ فیورٹس آسٹریلیا سے ہے اور آج تک پاکستان 16 ون ڈے انٹرنیشنلز میں آسٹریلیا کو نہیں ہرا پایا اور عجیب بات یہ ہے کہ ٹی ٹونٹی انٹرنیشنلز میں بھی پاکستان آسٹریلیا کے خلاف کبھی نہیں جیتا ہے۔
آسٹریلیا کی خواتین ٹیم نے پاکستان کے خلاف 16 میں سے 16 میچز جیتے ہیں اور آخری دفعہ دونوں کا مقابلہ 2023 میں ہوا تھا۔ پاکستان کی ٹیم جو پہلے دو میچز میں بنگلا دیش اور بھارت سے ہار چکی ہے آج پریما داسا اسٹیڈیم کولمبو میں آسٹریلیا کے مدمقابل ہوگی۔
پاکستان اگر آج کا میچ بھی ہار گیا تو ان کو سیمی فائنل کھیلنے کے لیے باقی کے اپنے سنگل لیگ کے چار میچز جیتنا لازمی ہوجائے گا۔
پاکستان ٹیم مینجمنٹ کے مطابق ابھی تک فیصلہ نہیں کیا گیا کہ بھارت سے شکست کے بعد ٹیم میں کوئی تبدیلی کی جائے یا نہ کی جائے۔
کپتان فاطمہ ثنا نے کہا کہ ٹاس سے پہلے پچ کو دیکھ کر پلیئنگ 11 کا فیصلہ کیا جائے گا۔