وزیر بلدیات سندھ ناصر حسین شاہ نے کہا ہے کہ کراچی پریس کلب کی رہائشی منصوبوں کے ترقیاتی کاموں کے لیے ٹینڈرز دیے جا رہے ہیں۔ تمام ترقیاتی کام پریس کلب کی زیر نگرانی مکمل کیے جائیں گے۔ ایم ڈی اے میں 80۔20 فارمولے کی بھی منظوری دے دی گئی ہے۔
پریس کلب کے نئے ممبران کے لیے پلاٹوں کی قرعہ اندازی بھی اسی ماہ کردی جائے گی۔ حکومتِ سندھ چئیرمین بلاول بھٹو زرداری کے احکامات کی روشنی میں صحافیوں کے تمام مسائل کے حل کیلیے سنجیدہ کوششیں کر رہی ہے۔ وزیراعلیٰ سید مراد علی شاہ بھی اس سلسلے میں ذاتی دلچسپی لے رہے ہیں۔
ان خیالات کا اظہار انہوں نے بدھ کو کراچی پریس کلب کے دورے کے موقع پر پر کلب کی مجلس عاملہ سے ملاقات اور بعد ازاں میڈیا سے بات چیت کرتے ہوئے کیا۔ قبل ازیں وزیر بلدیات سندھ سید ناصر حسین شاہ کی پریس کلب آمد پر صدر فاضل جمیلی، سیکریٹری سہیل افضل خان ودیگر عہدیداروں نے استقبال کیا۔ ملاقات میں صحافیوں کی فلاح و بہبود، رہائشی اسکیموں، اور پریس کلب کی ترقیاتی ضروریات پر تفصیلی گفتگو کی گئی۔
میڈیا سے گفتگو کرتے ہوئے ناصر حسین شاہ نے کہا کہ کراچی کی بڑی سڑکوں کے ساتھ اندرونی سڑکوں کو بنایا جائے گا۔ سعید غنی کے کاموں کو آگے بڑھاؤں گا۔ صرف سڑکیں ہی نہیں بنائیں گے بلکہ سیوریج سسٹم کو بھی بہتر بنائیں گے۔ اس سال سب سے زیادہ اسکیمیں مکمل کی ہیں۔ سندھ سالڈ ویسٹ کی کارکردگی کو بہتر بنانے کی کوشش کی جارہی ہے۔ ایک ٹاسک ٹیم بنائی جارہی ہے۔ ہم چاہیں گے کہ نشاندہی کی جائے۔ پانی کے مسائل اور بلڈنگ کنٹرول کے مسائل کو بہتر کیا جارہا ہے۔
انسانی جانوں کے لیے خطرناک عمارات کا پراپر متبادل انتظام کیا جارہا ہے۔ وہاں کے رہائشیوں کو متبادل فراہمی کے لیے کام کیا جائے گا۔ انہوں نے کہا کہ ایسا نہیں کہ جو سڑک بنائی جائے وہ ٹوٹ گئی۔ ایسا ہوتا تو شارع فیصل بھی ٹوٹ جاتی۔ ایسی شکایات پر نوٹس لیا گیا اور وہاں کام کرایا گیا۔
ناصر شاہ نے کہا کہ بلاول بھٹو زرداری نے پنجاب میں پریشان حال عوام کو فوری امداد دینے کی بات کی تھی تاکہ چیزیں بہتر کی جاسکے۔ پیپلز پارٹی نے پارٹی چیئرمین بلاول بھٹوزرداری کو بے جا تنقید کا نشانہ بنانے کا جواب دیا ہے۔ بلاول بھٹو زرداری بات پنجاب کے لوگوں کی سپورٹ میں کررہے ہیں جسے غلط رنگ دیا جارہا ہے۔ عظمیٰ بخاری سکھر آجائیں ان کو دورہ کرائیں گے۔ عظمیٰ بخاری سندھ کے اسپتالوں کا دورہ کرلیں۔ سیاست میں گرما گرمی نہیں ہونی چاہیے۔ چچا بھتیجی کے جھگڑے کا رنگ دیا جارہا ہے۔ جس کا نقصان وفاقی حکومت کو ہوگا۔
صوبائی وزیر نے کہا کہ بڑی مشکل سے ملک بہتری کی طرف جارہا ہے جس میں فیلڈ مارشل، وزیراعظم اور صدر زرداری کا اہم کردار ہے ملک ڈیفالٹ سے نکال کر بہتری کی طرف لائے۔ وزیر اعلی پنجاب مریم نواز خاتون ہیں ان کا احترام کرتا ہوں۔
ایک سوال کے. جواب میں وزیر بلدیات ناصر شاہ نے کہا کہ پیپلز پارٹی کو شاہد خاقان عباسی، عظمیٰ بخاری سمیت کسی سے کارکردگی سرٹیفکیٹ لینے کی ضرورت نہیں ہے۔ پیپلز پارٹی بغیر کسی سہارے کے عوامی ووٹوں سے منتخب ہوتی یے۔ سندھ کی عوام صوبائی حکومت اور پیپلز پارٹی سے مطمئن ہیں۔ 2029 کے عام انتخابات میں عوامی ووٹوں سے ملک بھر میں کامیابی حاصل کریں گے۔ بلاول بھٹو زرداری اگلے وزیراعظم ہوں گے۔
وزیرِ بلدیات سید ناصر حسین شاہ نے پریس کلب کے عہدیداروں سے گفتگو کرتے ہوئے کہا کہ سندھ حکومت صحافیوں کے مسائل سے بخوبی آگاہ ہے اور ان کے حل کے لیے عملی اقدامات کیے جارہے ہیں۔ ملاقات کے اختتام پر وزیرِ بلدیات کو کراچی پریس کلب کی جانب اجرک کا تحفہ پیش کیا گیا۔