نیشنل الیکٹرک پاور ریگولیٹری اتھارٹی نے جنوری 2023 میں ملک بھر میں ہونے والے بڑے بجلی بریک ڈاؤن پر کے الیکٹرک پر 2 کروڑ 50 لاکھ روپے کا جرمانہ عائد کردیا۔
نیپرا کے مطابق کے الیکٹرک کی آپریشنل ذمہ داریوں میں ناکامی ثابت ہوئی جبکہ کمپنی کی جانب سے جمع کرائی گئی وضاحتیں پاور بریک ڈاؤن کا جواز فراہم نہیں کرتیں۔ اتھارٹی کا کہنا ہے کہ بریک ڈاؤن کی تمام تر ذمہ داری صرف نیشنل گرڈ پر ڈالنا درست نہیں بلکہ کے الیکٹرک کو اپنے نظام کی کمزوریوں اور خامیوں کا ذمہ دار قرار دیا گیا۔
فیصلے میں کہا گیا کہ کے الیکٹرک کی جانب سے دیا گیا لو سسٹم انرشیا کا حوالہ تکنیکی طور پر درست مگر ناکافی ہے جبکہ کمپنی کی بلیک اسٹارٹ صلاحیت کی وضاحت غیر مؤثر ثابت ہوئی۔ نیپرا کے مطابق بلیک اسٹارٹ مشق کے باوجود کے الیکٹرک حقیقی بحران میں ناکام رہا اور بار بار ٹرپنگ سے ظاہر ہوتا ہے کہ حفاظتی اقدامات مؤثر نہیں تھے۔
اتھارٹی نے مزید کہا کہ بلیک اسٹارٹ پلانٹ کی تکنیکی خامیاں بدستور برقرار ہیں جس سے ظاہر ہوتا ہے کہ سسٹم کی اپ گریڈیشن کے وعدے پورے نہیں کیے گئے۔ نیپرا نے کے الیکٹرک کے جوابات کو غیر اطمینان بخش اور ناقابلِ قبول قرار دیتے ہوئے کمپنی کو 15 روز کے اندر جرمانہ جمع کرانے کا حکم دیا۔
واضح رہے کہ نیپرا نے کے الیکٹرک کو سماعت کا موقع فراہم کیا تھا۔ ابتدائی سماعت 14 نومبر 2024 کو ہونا تھی جو کے الیکٹرک کی درخواست پر مؤخر کی گئی بعد ازاں 20 مارچ 2025 کو نیپرا ہیڈ آفس میں سماعت ہوئی۔
یاد رہے کہ 23 جنوری 2023 کو کراچی، سندھ، جنوبی پنجاب اور اسلام آباد کے کئی علاقوں میں بجلی کا بڑا بریک ڈاؤن ہوا تھا جس کے باعث ہوائی اڈوں اور اہم صنعتی یونٹس میں بھی بجلی کی فراہمی معطل ہوگئی تھی۔ ابتدائی رپورٹوں کے مطابق ٹرانسمیشن لائن اور پاور پلانٹس کے درمیان رابطہ منقطع ہونے سے فریکوئنسی گر گئی تھی جس کے نتیجے میں پوری نیشنل گرڈ میں کیسکیڈنگ ٹرپنگ ہوئی۔