دنیا بھر میں آزادیٔ صحافت کے لیے قربانیاں دینے والے 7 بہادر صحافیوں کو سال 2025 کے ورلڈ پریس فریڈم ہیروز ایوارڈ کے لیے منتخب کر لیا گیا ہے جن میں فلسطین کی شہید صحافی مریم ابو دقہ بھی شامل ہیں۔
انٹرنیشنل پریس انسٹی ٹیوٹ کے مطابق یہ اعزاز اُن صحافیوں کو دیا جا رہا ہے جنہوں نے سچ بولنے، حقائق اجاگر کرنے اور عوام کی آواز بننے کے لیے اپنی جانوں کی قربانی دی۔ ایوارڈز کی تقریب 24 اکتوبر کو آسٹریا کے دارالحکومت ویانا میں ادارے کی 75ویں سالگرہ کے موقع پر منعقد ہوگی۔
فلسطینی صحافی مریم ابو دقہ کو اسرائیلی فوج نے 25 اگست 2025 کو غزہ میں اس وقت شہید کیا جب وہ میدانِ جنگ میں اپنی صحافتی ذمہ داریاں نبھا رہی تھیں۔ مریم ابو دقہ کی شہادت کو فلسطینی صحافت کی تاریخ میں ایک علامتی باب قرار دیا جا رہا ہے۔
ایوارڈ کے دیگر نامزد صحافیوں میں یوکرین کی جنگ میں جان دینے والی صحافی وکٹوریہ روشچینا، امریکا کے سینئر مدیر مارٹن بیرن، پیرو کے تفتیشی صحافی گستاوو گوریٹی، ہانگ کانگ کے آزادیٔ اظہار کے حامی جمی لائی، اور ایتھوپیا کے باہمت صحافی تسفالم والدیس شامل ہیں۔