بلوچستان کے سرحدی علاقے اسپن بولدک میں پاک فوج نے افغان طالبان اور فتنہ الخوارج کے بیک وقت تین مختلف مقامات پر کیے گئے حملوں کو ناکام بناتے ہوئے 15 سے 20 دہشت گردوں کو ہلاک کر دیا۔
سیکیورٹی ذرائع کے مطابق علی الصبح افغان طالبان اور فتنہ الخوارج نے اسپن بولدک کے اطراف پاکستانی چیک پوسٹوں پر حملے کی کوشش کی تاہم پاک فوج کے جوانوں نے فوری اور مؤثر جوابی کارروائی کرتے ہوئے حملہ آوروں کو پسپا ہونے پر مجبور کر دیا۔
ذرائع کا کہنا ہے کہ افغان طالبان اور فتنہ الخوارج کے دہشت گرد دیہات اور عام شہریوں کو ڈھال کے طور پر استعمال کر رہے تھے جس کے باعث فورسز نے انتہائی احتیاط کے ساتھ کارروائی کی۔ اس دوران کئی دہشت گردوں کے مارے جانے اور ان کے ٹھکانوں کے تباہ ہونے کی اطلاعات ہیں۔
سیکیورٹی ذرائع کے مطابق افغان طالبان اور فتنہ الخوارج نے پاک افغان دوستی گیٹ کو اپنی جانب سے اڑا دیا جو ان کے اس مؤقف کی نفی کرتا ہے کہ وہ سرحدی تجارت یا عوامی آمدورفت کے حامی ہیں۔
ذرائع کے مطابق اسپن بولدک اور چمن کے مضافات میں مزید افغان طالبان کے جمع ہونے کی اطلاعات بھی موصول ہو رہی ہیں۔پاک فوج کی جانب سے علاقے میں سیکیورٹی سخت کر دی گئی ہے اور کسی بھی نئی پیش رفت پر مکمل نظر رکھی جا رہی ہے۔
اس سے قبل پاک فوج نے گزشتہ رات کرم سیکٹر پر افغان طالبان کے حملے کی کوشش کو بھی ناکام بنایا تھا۔ اس کارروائی میں 8 پوسٹیں اور 6 ٹینک بمعہ عملہ تباہ کیے گئے جبکہ متعدد دہشت گرد ہلاک ہوئے تھے۔