سندھ کے سینئر وزیر اور صوبائی وزیر برائے اطلاعات، ٹرانسپورٹ و ماس ٹرانزٹ شرجیل انعام میمن نے کہا ہے کہ سینیٹر تاج حیدر برج کراچی کے شہریوں کے لیے پاکستان پیپلز پارٹی کی حکومت سندھ کا ایک اہم منصوبہ ہے۔ یہ برج یلو لائن بی آر ٹی منصوبے کا حصہ ہے اور کم عرصے میں مکمل کیا گیا ہے۔
ایک ویڈیو بیان میں شرجیل انعام میمن نے بتایا کہ سینیٹر تاج حیدر برج کے ساتھ ایک اور برج بھی تعمیر کیا جا رہا ہے، جس کے بعد کل آٹھ لینز مکمل ہو جائیں گے۔ منصوبے میں سائیکل سواروں کے لیے علیحدہ ٹریک بھی بنایا گیا ہے تاکہ وہ محفوظ طریقے سے سفر کر سکیں اور ٹریفک میں رکاوٹ پیدا نہ ہو۔
انہوں نے کہا کہ پاکستان پیپلز پارٹی کی حکومت سندھ بی آر ٹی کے مختلف منصوبوں پر بھرپور کام کر رہی ہے اور یہ منصوبہ کورنگی سمیت دیگر علاقوں کے شہریوں کے لیے بڑی سہولت ثابت ہوگا۔
شرجیل انعام میمن نے مزید کہا کہ حکومت سندھ کا عزم ہے کہ کراچی میں جدید ٹرانسپورٹ اور سڑکوں کا نظام فراہم کیا جائے تاکہ شہریوں کے ٹریفک مسائل کم ہوں اور لوگ کم خرچ میں ایئر کنڈیشن بسوں کے ذریعے آرام دہ سفر کر سکیں۔
سینئر وزیر نے بتایا کہ یلو لائن منصوبے کے تحت ای وی بسز بھی متعارف کرائی جا رہی ہیں جس سے ماحولیاتی بہتری اور سفری سہولتوں میں نمایاں اضافہ ہوگا۔