اسلام آباد: وفاقی وزیرداخلہ محسن نقوی سے برطانوی ہائی کمشنر جین میریٹ اور قائم مقام امریکی سفیر نیٹلی بیکر نے الگ الگ ملاقاتیں کیں۔ ملاقاتوں میں دوطرفہ تعلقات، خطے کی مجموعی صورتحال اور باہمی دلچسپی کے امور پر تفصیلی تبادلہ خیال کیا گیا۔
ملاقات کے دوران انسدادِ منشیات، انسانی اسمگلنگ اور سیکیورٹی کے شعبوں میں تعاون بڑھانے پر بھی بات چیت ہوئی۔ وزیرداخلہ محسن نقوی نے پانچ برس بعد برطانیہ کے لیے فضائی آپریشن کے آغاز پر برطانوی حکومت اور ہائی کمشنر کا شکریہ ادا کیا۔
برطانوی ہائی کمشنر اور قائم مقام امریکی سفیر نے منشیات کے خلاف پاک بحریہ کے حالیہ آپریشن کو سراہا۔ برطانوی ہائی کمشنر نے وزیر داخلہ کو بتایا کہ برطانوی نیشنل کرائم ایجنسی کے ڈائریکٹر جنرل آئندہ ماہ پاکستان کا دورہ کریں گے، جس دوران امیگریشن اور انسدادِ منشیات کے شعبوں میں مفاہمتی یادداشتوں (MoUs) پر دستخط کیے جائیں گے۔
محسن نقوی نے کہا کہ برطانوی ہائی کمیشن کے تعاون سے سینٹر آف ایکسیلنس جیسے منصوبے پاکستانی اداروں کی استعداد کار بڑھانے میں اہم کردار ادا کریں گے۔ اس مرکز کے قیام سے پاکستان اور برطانیہ کے درمیان میوچل لیگل اسسٹنس اور ایکسٹراڈیشن کے معاملات میں تعاون مزید مضبوط ہوگا۔
برطانوی ہائی کمشنر نے کہا کہ برطانیہ پاکستان کے ساتھ تعلقات کو انتہائی اہمیت دیتا ہے۔
وزیر داخلہ محسن نقوی نے اس موقع پر کہا کہ پاکستان عالمی برادری کے ساتھ مل کر دہشتگردی کے خاتمے کے لیے پرعزم ہے۔
قائم مقام امریکی سفیر نے کہا کہ دہشتگردی اور انتہاپسندی کے خاتمے کے لیے پاکستان کی کوششیں قابلِ تحسین ہیں، اور امریکا سیکیورٹی اور انسدادِ دہشتگردی کے شعبوں میں پاکستان کے ساتھ تعاون جاری رکھے گا۔