وفاقی دارالحکومت میں دودھ کے معیار کو یقینی بنانے کے لیے اسلام آباد فوڈ اتھارٹی نے کارروائی کرتے ہوئے 10 ہزار 890 لیٹر دودھ کی جانچ پڑتال کی گئی جس میں 2 ہزار 340 لیٹر دودھ ناقص و ملاوٹی قرار دے کر تلف کردیا گیا۔
ترجمان کے مطابق 20 دودھ بردار گاڑیوں کی چیکنگ کے دوران 17 گاڑیاں معیاری پائی گئیں جبکہ 3 گاڑیوں میں بھرے دودھ کے سیمپلز فیل ہو گئے۔ قوانین کی خلاف ورزی پر متعلقہ گاڑیوں کے خلاف کارروائی کرتے ہوئے 1 لاکھ 18 ہزار روپے جرمانہ بھی عائد کیا گیا۔
ڈپٹی ڈائریکٹر اسلام آباد فوڈ اتھارٹی کا کہنا ہے کہ کارروائی علی الصبح این-5 میٹرو اسٹیشن نمبر 26 پر ناکہ بندی کے دوران کی گئی۔ڈاکٹر طاہرہ صدیق نے کہا کہ شہریوں کو خالص اور غذائیت سے بھرپور دودھ کی فراہمی اولین ترجیح ہے۔ ملاوٹ کسی صورت برداشت نہیں کی جائے گی کیونکہ غیر معیاری دودھ بچوں اور بزرگوں میں مختلف بیماریوں کا سبب بنتا ہے۔
اسلام آباد فوڈ اتھارٹی کے مطابق دودھ کے معیار پر زیرو ٹالرنس پالیسی کے تحت کارروائیاں مسلسل جاری رہیں گی۔