ڈائریکٹوریٹ جنرل آف امیگریشن اینڈ پاسپورٹس نے سوشل میڈیا پر پاکستانی پاسپورٹ کے بارے میں گردش کرنے والی گمراہ کن خبروں اور تصاویر کو سختی سے مسترد کردیا ہے۔ ترجمان کے مطابق پاسپورٹ کے فرنٹ کور میں کسی قسم کی تبدیلی نہیں کی گئی اور سوشل میڈیا پر شیئر ہونے والی تمام معلومات جعلی ہیں۔
محکمہ پاسپورٹس نے شہریوں سے اپیل کی ہے کہ غیر مصدقہ اور بے بنیاد خبروں پر یقین کرنے کے بجائے سرکاری ذرائع سے ہی معلومات حاصل کریں۔ ترجمان نے بتایا کہ قومی پاسپورٹ میں صرف چند سیکیورٹی فیچرز کو اپ گریڈ کیا گیا ہے تاکہ اس کی بین الاقوامی ساکھ اور سیکیورٹی مزید مضبوط ہو سکے، تاہم اس کے ڈیزائن میں کوئی تبدیلی عمل میں نہیں لائی گئی۔
بیان میں یہ بھی کہا گیا کہ پاسپورٹ سے متعلق غلط معلومات پھیلانا قومی ذمہ داری کے منافی عمل ہے اور پراپیگنڈہ پھیلانے والے عناصر کے خلاف قانونی کارروائی کی جائے گی۔