پونے سے تعلق رکھنے والے اعلیٰ تعلیم یافتہ میاں اور بیوی جب برطانیہ سے واپس آئے تو ایسے دھوکے میں پھنسے کہ ذہنی اذیت کے علاوہ 14 کروڑ روپے بھی کھو بیٹھے جو ان کی زندگی بھر کی جمع پونجی تھی۔
دیپک کھڑکے کی اپنے عقیدت مندوں کے ساتھ ایک تصویرانڈیا کے شہر پونے سے تعلق رکھنے والا ایک اعلیٰ تعلیم یافتہ جوڑا جب برطانیہ سے واپس اپنے ملک آیا توانھیں علم نہیں تھا کہ اپنی دو بیٹیوں کی بیماری کے علاج کی تلاش میں وہ ایک مبینہ فراڈ میں پھنس کر اپنی زندگی بھر کی جمع پونجی سے محروم ہونے والے ہیں۔
ان جوڑے کو یہ کہہ کر دھوکہ دیا گیا کہ ایک مذہبی شخصیت ان کی بیٹیوں کا علاج کرے گی اور وہ بالکل صحتیاب ہو جائیں گی۔
یہ خاندان 12 سال سے برطانیہ میں مقیم تھا۔ شوہر اور بیوی دونوں آئی ٹی کے شعبے میں اعلیٰ عہدوں پر کام کر چکے تھے۔
اس جوڑے نے اپنی دو معذور بیٹیوں کے علاج کے لیے ویدیکا پندھرپورکر عرف ’مولی‘ اور بھونڈو بابا دیپک کھڑکے نامی شخصیات سے رابطہ کیا۔
ویدیکا پندھرپورکر نے یہ دعویٰ کیا کہ ان میں ایک ’بزرگ ہستی‘ رہتی ہے اور وہ دونوں لڑکیوں کا کامیاب علاج کریں گے۔ اس کے عوض انھوں نے برطانیہ پلٹ جوڑے سے 14 کروڑ روپے کی رقم وصول کی۔
پولیس نے اس جوڑے کی شکایت پر مقدمہ درج کر کے تفتیش شروع کر دی ہے۔
بی بی سی نے اس مقدمے کے حوالے سے ملزم ویدیکا پندھرپورکر اور دیپک کھڑکے کا مؤقف حاصل کرنے کی کوشش کی مگر چونکہ ملزم اور ان کے ساتھی اس وقت مفرور ہیں اس وجہ سے ان سے رابطہ ممکن نہیں ہو سکا۔
’زندگی بھر کی جمع پونچی ضائع ہو گئی‘
متاثرہ خاندان کے وکلا کی طرف سے دی گئی معلومات کے مطابق برطانیہ پلٹ جوڑے نے دیپک کھڑکے سے ان کے ایک مذہبی مقام پر ملاقات کی۔ کھڑکے نے اس خاندان کا تعارف ویدیکا پندھرپورکر سے کروایا۔
انھوں نے متعلقہ خاندان کو یقین دلایا کہ وہ لڑکیوں کی بیماری کا تسلی بخش علاج کر سکتے ہیں۔
ویدیکا پندھرپور اور دیپک کھڑکےویدیکا پندھرپورکر نے انھیں کہا کہ ’ایک بزرگ ہستی میرے اندر رہتی ہے، اس لیے میں لڑکیوں کی بیماریوں کا علاج کر سکتا ہوں۔‘
متاثرہ خاندان کو بتایا گیا کہ دونوں لڑکیوں کے علاج کے لیے رقم کی ضرورت ہو گی اور اس رقم کو حاصل کرنے کے لیے اس خاندان کو اپنے تمام اثاثے فروخت کرنا پڑے۔
اس خاندان کے وکلا کے مطابق ’انھیں برطانیہ میں اپنا گھر بھی فروخت کرنا پڑا۔ انھوں نے اس سے رقم اکٹھی کی۔‘
اس خاندان نے الزام لگایا ہے کہ ویدیکا پندھرپورکر نے اپنے ساتھی کے ساتھ مل کر یہ غبن کیا ہے۔
’ملزم نے بنگلہ خریدا‘
متعلقہ خاندان کے وکیل وجے تھومبرے نے اس بارے میں معلومات دیتے ہوئے بتایا کہ برطانیہ کی ایک آئی ٹی کمپنی میں اعلیٰ عہدے پر کام کرنے والے آئی ٹی انجینیئر اور ان کی اہلیہ نے اپنی دو معذور بیٹیوں کی دیکھ بھال کے لیے سنہ 2018 میں انڈیا واپس آنے کا فیصلہ کیا تھا۔
وکیل کے مطابق ویدیکا پندھرپور نے جوڑے سے ملنے والی رقم کو اپنے اکاؤنٹ میں منتقل کیا اور کوتھروڈ کی ایک سوسائٹی میں ایک علیشان بنگلہ خریدا۔
ویدیکا پندھرپور پر بھروسہ کرتے ہوئے جوڑے نے اپنے تمام اثاثے ایک، ایک کر کے ان شخصیات کے نام منتقل کیے اور یوں اپنا سب کچھ لٹا دیا۔
سب سے پہلے ویدیکا پندھرپور کو انھوں نے بینک اکاؤنٹ میں رقم منتقل کی اور پھر ایل آئی سی، میوچل فنڈ اور پرویڈنٹ فنڈ کی رقم بھی انھیں بھیج دی۔
پولیس نے واقعے کا مقدمہ درج کر کے تحقیقات کا آغاز کر دیا ہےوکیل وجے کے مطابق بعد ازاں متاثرہ جوڑے نے برطانیہ میں اپنا گھر اور فارم ہاؤس بیچ کر حاصل ہونے والی رقم بھی انھیں دے دی۔
یہ معاملہ یہاں نہیں رُکا بلکہ اس کے بعد اس خاندان نے پونے میں اپنے فلیٹ، گاؤں میں ایک گھر اور قابل کاشت زمین فروخت کر کے رقم ویدیکا پندھرپور اور دیپک کھڑکے کو دے دی۔
متاثرہ خاندان نے پولیس کو تمام لین دین کے ثبوت فراہم کیے ہیں۔
خاندان کے وکلا نے بتایا کہ اب یہ میاں بیوی اپنی دو بیٹیوں کے ساتھ کرائے کے مکان میں رہتے ہیں اور انھیں علاج کے لیے رقم کی بھی ضرورت ہے۔
دیپک کھڑکے کی ایک تصویرمتاثرہ خاندان کا کہنا ہے کہ ’ہم نے بیٹیوں کی محبت کی وجہ سے ان افراد پر بھروسہ کیا لیکن انھوں نے (انصاف کا) قتل کیا۔‘
ایڈووکیٹ تھومبرے نے مزید کہا کہ ’لڑکیوں کی سنگین بیماری کے مکمل علاج کے نام پر غبن کرنے کے معاملے میں دونوں ملزمان کے علاوہ ان کے خاندان کے دیگر افراد کو بھی نامزد کیا گیا ہے۔‘
ان کا مؤقف ہے کہ چار سے پانچ لوگوں نے ان مؤکلوں کو دھوکا دیا ہے۔
شکایت کنندگان کے وکیل نے بتایا کہ ’جب میرے مؤکلوں کی بیٹیوں کی صحت میں بہتری نہیں آئی تو پھر انھوں نے پولیس سے رجوع کیا۔‘
تھومبرے نے کہا کہ ’میرے مؤکلوں نے تین نومبر کو شکایت درج کروائی اور فی الحال پولیس کی تحقیقات جاری ہے۔ تاہم اس کے بعد ان نیم حکم شخصیات کے کچھ عقیدت مند متاثرہ خاندان کے افراد کو شکایت واپس لینے کی دھمکی دے رہے ہیں۔‘
انھوں نے کہا کہ ’برطانیہ سے واپس آنے والے خاندان کی دونوں بیٹیوں کو علاج کی ضرورت ہے اور یہ بہت ضروری ہے کہ وہ رقم واپس حاصل کریں۔ ہم اس معاملے میں عدالت میں اپیل کریں گے۔‘
