پاکستان میں بابا گرو نانک کے جنم دن کی یاترا کے لیے بھارت سے آنے والے جتھے میں شامل سکھ خاتون سربجیت کور نے اسلام قبول کر کے پاکستانی شہری ناصر حسین سے شادی کرلی۔
خاتون کا اسلامی نام نور رکھا گیا ہے۔ نکاح نامے کے مطابق 48 سالہ سربجیت کور نے 5 نومبر کو ضلع شیخوپورہ کے فاروق آباد میں ناصر حسین سے نکاح کیا جس میں حق مہر 10 ہزار روپے ادا کیا گیا۔
سربجیت کور 4 نومبر کو بھارتی یاتریوں کے ساتھ پاکستان آئی تھیں لیکن 13 نومبر کو بھارت واپس جانے والے یاتریوں میں شامل نہیں تھیں۔ اسی دن ان کا ویزہ بھی ختم ہو گیا تھا جس کے بعد انہیں لاپتہ قرار دے کر تلاش شروع کی گئی تھی۔
بعد ازاں معلوم ہوا کہ سربجیت کور نے اسلام قبول کر کے پاکستان میں شادی کرلی جس کے بعد ان کی رہائش اور قانونی حیثیت کے حوالے سے امور طے پائے۔