وزیراعظم شہباز شریف دو روزہ سرکاری دورے پر بحرین پہنچ گئے جہاں منامہ ایئرپورٹ پر بحرین کے ولی عہد، نائب سپریم کمانڈر بحرینی افواج اور وزیراعظم شہزادہ سلمان بن حمد نے ان کا پرتپاک استقبال کیا۔
سرکاری اعلامیے کے مطابق نائب وزیراعظم اسحاق ڈار، وزیرداخلہ محسن نقوی اور وزیراطلاعات عطا اللہ تارڑ سمیت اعلیٰ سطح کا وفد بھی وزیراعظم کے ہمراہ ہے۔
ترجمان دفترخارجہ کا کہنا ہے کہ وزیراعظم اپنے دورے کے دوران بحرینی قیادت سے اہم ملاقاتیں کریں گے، جن میں تجارت، سرمایہ کاری، توانائی، ٹیکنالوجی، تعلیم اور ثقافت سمیت مختلف شعبوں میں دوطرفہ تعاون بڑھانے پر گفتگو ہوگی۔
وزیراعظم کا یہ دورہ پاکستان اور بحرین کے تعلقات کو مزید مضبوط بنانے کی اہم کوشش قرار دیا جا رہا ہے۔