وفاقی وزیر داخلہ و نارکوٹکس کنٹرول محسن نقوی نے اسلام آباد انٹرنیشنل ایئرپورٹ کا اچانک دورہ کیا اور امیگریشن پراسیس کا تفصیلی جائزہ لیا۔
وزیر داخلہ نے بیرون ملک جانے والے مسافروں سے ملاقات کی اور ان کے مسائل سنے۔ انہوں نے ویزا ایجنٹس کے خلاف سخت کارروائی کا حکم دیتے ہوئے کہا کہ ایجنٹ مافیا پیسے کے لالچ میں شہریوں کے مستقبل سے کھیل رہا ہے جسے برداشت نہیں کیا جائے گا۔
محسن نقوی نے واضح کیا کہ ضروری دستاویزات رکھنے والے مسافروں کو سفر سے نہیں روکا جائے گا۔جعلی یا غیر تصدیق شدہ دستاویزات رکھنے والے مسافروں کو بیرون ملک جانے کی اجازت نہیں دی جائے گی۔
انہوں نے مزید کہا کہ معصوم لوگوں کو نوکریوں کا جھانسہ دے کر بیرون ملک بھیجنے والے ایجنٹس کے خلاف سخت کارروائی کی جائے گی۔
وزیر داخلہ نے یہ بھی کہا کہ آئندہ مسافروں کو کسی قسم کی شکایت کا موقع نہیں ملے گا اور ایئرپورٹ پر تمام عملے اور ایجنٹس کی کارکردگی کا جائزہ لیا جائے گا۔