نائب وزیراعظم و وزیر خارجہ اسحاق ڈار نے کہا ہے کہ خطے میں پائیدار امن اور ترقی کا انحصار افغانستان میں امن و استحکام پر ہے۔ وہ شنگھائی تعاون تنظیم (ایس سی او) کی وزرائے خارجہ کانفرنس سے خطاب کر رہے تھے۔
اسحاق ڈار نے اپنے خطاب میں کہا کہ پاکستان ہمیشہ سے یہ مؤقف رکھتا ہے کہ افغانستان اپنی سرزمین کسی بھی قسم کی دہشت گردی کے لیے استعمال نہ ہونے دے۔ انہوں نے کہا کہ خطے کی مجموعی سلامتی اور اقتصادی ترقی کا براہِ راست تعلق افغانستان کے داخلی حالات سے ہے۔
انہوں نے اس بات پر زور دیا کہ خطے کے ممالک کو مشترکہ حکمت عملی کے تحت امن، استحکام اور انسدادِ دہشت گردی کے لیے تعاون بڑھانا ہوگا۔ ان کا کہنا تھا کہ علاقائی تعاون ہی خطے میں دیرپا امن کے قیام کی بنیاد بن سکتا ہے۔
نائب وزیراعظم نے کانفرنس کے شرکا کو پاکستان کی معاشی اصلاحات اور سرمایہ کاری دوست پالیسیوں پر بھی بریفنگ دی۔ انہوں نے بتایا کہ حکومتی اصلاحاتی اقدامات کے مثبت نتائج سامنے آرہے ہیں اور پاکستان علاقائی روابط، تجارت اور سرمایہ کاری کے فروغ کے لیے سنجیدہ اقدامات کر رہا ہے۔
اسحاق ڈار نے اس امید کا اظہار کیا کہ افغانستان میں امن کے قیام سے پورے خطے میں خوشحالی اور ترقی کے نئے دروازے کھلیں گے جبکہ پاکستان خطے میں تعاون اور استحکام کے لیے اپنا کردار جاری رکھے گا۔