وزیراعلیٰ پنجاب مریم نواز نے واضح کیا ہے کہ صوبے کی ہر مرلے، ہر کنال اور ہر ایکڑ زمین پر صرف اور صرف اصل مالک کا ہی حق اور قبضہ ہوگا۔ انہوں نے کہا کہ قبضہ مافیا کے خلاف کارروائی کسی سفارش یا دباؤ کے بغیر ہوگی اور فیصلوں پر فوری عمل درآمد یقینی بنایا جائے گا۔
وزیراعلیٰ پنجاب کی زیر صدارت اجلاس میں پراپرٹی آرڈیننس پر پیش رفت کا تفصیلی جائزہ لیا گیا، جہاں بریفنگ کے دوران بتایا گیا کہ حالیہ اقدامات کے نتیجے میں صرف 48 گھنٹوں میں ایک ہزار سے زائد خاندانوں کو اُن کی زمینیں واپس دلائی جا چکی ہیں۔
اجلاس میں فیصلہ کیا گیا کہ پنجاب بھر میں خواتین کے زمین سے متعلق مقدمات کو خصوصی ترجیح دی جائے گی، جبکہ بے سہارا بیواؤں کے قبضہ کیسز فوری نمٹانے کا حکم بھی جاری کیا گیا۔
مریم نواز کا کہنا تھا کہ زمین کا اصل مالک جب تک عملی طور پر قبضہ حاصل نہ کرے، فیصلہ ادھورا سمجھا جائے گا۔ انہوں نے شہریوں کو ہدایت کی کہ اگر کسی پراپرٹی یا زمین پر قبضے کا مسئلہ ہو تو متعلقہ ڈپٹی کمشنر آفس میں فوری درخواست جمع کرائیں، تاکہ قانونی کارروائی کے بعد درست اور شفاف فیصلہ کیا جا سکے۔