پاکستان میں سوشل میڈیا صارفین کے درمیان ایک نوٹیفکیشن وائرل ہو رہا ہے، جس میں دعویٰ کیا گیا ہے کہ پاکستان ٹیلی کمیونیکیشن اتھارٹی نے سیکیورٹی وجوہات کے تحت غیر ملکی افراد کو پاکستانی سوشل میڈیا گروپس سے نکالنے کی ہدایت جاری کی ہے۔
وائرل پوسٹ میں دعویٰ کیا گیا کہ موجودہ ملکی سیکیورٹی صورتحال اور آن لائن صارفین کے ڈیٹا کے پیشِ نظر یہ اقدام ضروری ہے، اور ہدایات پر عمل نہ کرنے والے گروپ ایڈمنز کے خلاف قانونی کارروائی کی جائے گی۔
تاہم، پی ٹی اے نے اس دعوے کی سختی سے تردید کی ہے اور ایک وضاحتی بیان جاری کرتے ہوئے کہا ہے کہ یہ نوٹیفکیشن مکمل طور پر جعلی ہے۔ اتھارٹی نے واضح کیا کہ اس نے سوشل میڈیا گروپ ایڈمنز کو کسی بھی غیرملکی ممبر کو نکالنے کی ہدایت نہیں دی۔
پی ٹی اے نے عوام سے اپیل کی ہے کہ وہ غیر تصدیق شدہ معلومات کو شیئر کرنے سے گریز کریں اور سوشل میڈیا پر صرف اتھارٹی کے سرکاری ذرائع سے مستند اپڈیٹس پر بھروسہ کریں۔