فیڈرل انویسٹیگیشن ایجنسی کے مطابق ڈی جی ایف آئی اے رفعت مختار راجہ نے لاہور ایئرپورٹ کا اچانک دورہ کیا اور ڈیپارچر لاؤنج میں امیگریشن و ڈیپارچر پراسس کا تفصیلی جائزہ لیا۔
دورے کے دوران ڈی جی ایف آئی اے نے امیگریشن سروس ڈیلیوری مزید بہتر بنانے کی ہدایات جاری کیں۔ انہوں نے آف لوڈنگ کے معاملات میں مکمل شفافیت اور میرٹ پر مبنی کارروائی یقینی بنانے کے احکامات بھی دیے۔
ڈی جی ایف آئی اے نے مسافروں سے درپیش مسائل کے فوری حل پر زور دیتے ہوئے کہا کہ مسافروں کو بہترین امیگریشن سروس فراہم کرنا ایف آئی اے کی اولین ترجیح ہے۔ انہوں نے عملے کو ہدایت کی کہ امیگریشن پراسس میں غیر ضروری تاخیر ہرگز نہ کی جائے اور دورانِ ڈیوٹی بہترین اخلاق اور پیشہ ورانہ مہارت بروئے کار لائی جائے۔
رفعت مختار راجہ نے امیگریشن کاؤنٹرز پر اسٹاف کی کارکردگی، نظم و ضبط اور مجموعی ورک فلو کا بھی جائزہ لیا۔ انہوں نے ہدایت کی کہ غیر قانونی امیگریشن اور جعلی دستاویزات کے ذریعے سفر کرنے کی کوشش کرنے والے عناصر کی روک تھام کیلئے سخت اسکریننگ کو یقینی بنایا جائے۔
ترجمان ایف آئی اے کے مطابق، مسافروں کی سہولت کے لیے مزید اقدامات فوری طور پر شروع کرنے کی ہدایات جاری کر دی گئی ہیں۔