وفاقی وزیر صحت اور متحدہ قومی موومنٹ کے رہنما مصطفیٰ کمال نے کہا کہ شکر ادا کریں یہ فوج آپ کی گندگیوں کا جواب صرف پریس کانفرنس کر کے دے رہی ہے، اتنے ناپاک الزامات کے باوجود فوج صرف بات کر رہی ہے۔
کراچی میں پریس کانفرنس میں مصطفیٰ کمال کا کہنا تھا کہ پاک فوج نے خود سے بڑی ہندوستان کی فوج کے عزائم کو خاک میں ملایا، ہمیں اس فوج اور اس کے سربراہ پر فخر ہے اور احترام ہے۔ ہم اس بیانیہ کے خلاف ہیں کہ عوام اور فوج کے درمیان کوئی فاصلہ ہے۔
ان کا کہنا تھا کہ ہم بھی بند کمروں میں گلہ کرتے ہیں لیکن ہم نے کبھی ملک کی سالمیت کے خلاف کچھ نہیں کیا، ہم ہر صحیح بات کی تائید اور غلط بات کی تردید کریں گے، پی ٹی آئی کے دوستوں سے گزارش ہے کہ اپنی پالیسیوں پر نظرثانی کریں، اگر فوجی جنرل ان کی مرضی و منشا سے کام کریں تو ٹھیک ورنہ غلط ہیں، یہ رویہ افسوسناک ہے، یہ ممکن نہیں کہ جب آپ وزیراعظم ہوں جبھی ملک آگے بڑھے، یہ معاملہ ٹھیک نہیں۔
مصطفیٰ کمال کا کہنا تھاکہ یہ فوج کسی بھی ایک جماعت کی نہیں بلکہ پوری قوم کی ہے، یہ فوج ہی تھی جو خود سے 8 گنا بڑی طاقت سے سامنے سینہ سپر ہوئی، خطے میں بھارت کی بالادستی کے خواب کو چکناچور کردیا، اس فوج نے اس قوم کے سر کو فخر کو بلند کردیا، پاکستان کی عزت کے بڑھنے میں اللہ نے فوج سے کام لیا ہے۔
انہوں نے مزید کہا کہ پی ٹی آئی اور اس کے سربراہ قومی فوج اور اس کی لیڈر شپ کو پوری دنیا میں بدنام کررہے ہیں، پی ٹی آئی فوج کے حوصلے کو پست کرنے کی کوشش کررہے ہیں، ایم کیو ایم پاکستان اس بیانیے کے خلاف ہیں فوج اور عوام میں کوئی خلیج موجود ہے۔
ایم کیو ایم کے رہنما ڈاکٹر فاروق ستار کا کہنا تھاکہ تحریک انصاف کا بیانیہ قومی سلامتی کے خلاف ہے، ڈی جی آئی ایس پی آر نے ٹھیک کہا تھا بانی تحریک انصاف ذہنی مریض ہیں۔