افغان مہاجرین کے انخلا کی سرکاری ڈیڈ لائن ختم ہونے کے بعد نوشہرہ کے چار بڑے مہاجر کیمپوں سے واپسی کا عمل شروع ہو گیا ہے۔
ڈپٹی کمشنر نوشہرہ عرفان اللہ محسود کے مطابق خیبرآباد اور ترکمان کیمپوں سے سیکڑوں افغان مہاجرین اپنے وطن روانہ ہو رہے ہیں تاہم آکوڑہ خٹک اور دیگر کیمپوں و رہائشی علاقوں میں انخلا سست روی کا شکار ہے۔
انتظامی ذرائع نے بتایا کہ مہاجرین کے فوری انخلا کو یقینی بنانے کے لیے کیمپوں کی بجلی اور دیگر حکومتی سہولیات بند کر دی گئی ہیں جبکہ محکمہ صحت کے بی ایچ یو اور ڈسپنسریاں بھی معطل کر دی گئی ہیں۔
ذرائع کے مطابق آج سے مختلف علاقوں میں پولیس سرچ آپریشن کا آغاز کیا جائے گا تاکہ افغان مہاجرین کے انخلا کو مکمل طور پر یقینی بنایا جا سکے۔
ڈپٹی کمشنر نوشہرہ نے کہا کہ انتظامیہ تمام دستیاب وسائل استعمال کر رہی ہے تاکہ واپسی کے عمل کو مؤثر اور بروقت مکمل کیا جا سکے۔