سندھ حکومت کے نئے منصوبے ایس 4 کے تحت نصب جدید ترین آرٹیفیشل انٹیلی جنس کیمروں کی مدد سے کراچی سے چھینی یا چوری کی گئی 150 سے زائد گاڑیاں برآمد کر لی گئی ہیں۔
پولیس کے مطابق چوری اور چھینا جھپٹی کے الزامات میں اب تک 200 ملزمان کو گرفتار کیا جا چکا ہے جس میں ایک خاتون بھی شامل ہے۔
ذرائع نے بتایا کہ اے آئی کیمرے مختلف شہروں کے داخلی و خارجی راستوں پر نصب کیے گئے ہیں جو چہروں اور نمبر پلیٹس کی شناخت کرنے کی صلاحیت رکھتے ہیں۔ چوری شدہ گاڑیوں اور مطلوب ملزمان کا ڈیٹا ایس 4 کیمروں کے ڈیٹا بینک میں شامل کیا گیا ہے جس سے جیسے ہی کوئی گاڑی یا ملزم کسی داخلی یا خارجی راستے سے گزرتا ہے کیمرے فوری نشاندہی کرتے ہیں۔
کراچی میں حال ہی میں تشکیل دی گئی سندھ پولیس ہائی وے پیٹرول ٹیم فوری کارروائی کرتے ہوئے مذکورہ گاڑیوں کو روک کر ملزمان کو گرفتار کرتی ہے اور اس طرح سے چوری یا چھینی گئی گاڑیاں برآمد کی جاتی ہیں۔