حکومت نے دھواں چھوڑنے والی گاڑیوں کے خلاف سخت کارروائی کا فیصلہ کر لیا ہے۔ اب گاڑیوں کے مالکان کو ہدایت کی گئی ہے کہ وہ اپنی گاڑیوں کا پاک ای پی اے سے منظور شدہ لیبارٹریوں میں معائنہ کروائیں اور سرٹیفکیٹ حاصل کریں۔ بغیر سرٹیفکیٹ والی گاڑیوں کے خلاف قانونی کارروائی کی جائے گی۔
ادارہ برائے تحفظ ماحولیات اسلام آباد کے مطابق دھواں چھوڑنے والی گاڑیاں نقصان دہ گیسوں کے اخراج کا بڑا ذریعہ ہیں جو اسموگ کو بڑھاتی ہیں اور عوامی صحت کے لیے خطرہ ہیں۔ اس لیے ان کے خلاف سخت اقدامات کیے جا رہے ہیں۔
ادارہ نے گاڑیوں کے مالکان کو خبردار کرتے ہوئے کہا کہ گاڑیوں سے دھواں مقررہ معیار کے مطابق نکلنا چاہیے اور زیادہ دھواں چھوڑنے والی گاڑی چلانا قانوناً جرم ہے۔ خلاف ورزی کرنے والوں پر سخت قانونی کارروائی اور جرمانہ عائد کیا جائے گا۔
مالکان سے اپیل کی گئی ہے کہ وہ فوری طور پر اپنی گاڑیوں کا معائنہ کروا کر ضروری سرٹیفکیٹ حاصل کریں تاکہ کسی قسم کی قانونی پیچیدگی سے بچا جا سکے۔