خیبر پختونخوا کے بالائی پہاڑی علاقوں میں 13 تا 15 دسمبر تک بارش اور برفباری کی پیشگوئی کی گئی ہے جس کے پیشِ نظر پی ڈی ایم اے نے تمام متعلقہ اداروں کو پیشگی اقدامات کے لیے الرٹ جاری کر دیا ہے۔
پی ڈی ایم اے کے مطابق چترال، دیر، سوات، شانگلہ، کوہستان، مانسہرہ، ایبٹ آباد، گلیات، ہری پور، بونیر، مہمند، خیبر، اورکزئی، کرم اور شمالی و جنوبی وزیرستان میں بارش اور برفباری کا امکان ہے۔ پشاور، چارسدہ، مردان، نوشہرہ اور صوابی میں ہلکی بارش متوقع ہے۔
برفباری کے باعث ناران، کاغان، کلام اور جبوڑی سمیت بالائی علاقوں میں سڑکیں پھسلن کا شکار ہو سکتی ہیں جبکہ شدید بارش اور برفباری سے لینڈ سلائیڈنگ کا خطرہ بھی بڑھ سکتا ہے۔ مزید براں، میدانی علاقوں میں دھند کی شدت اور حد نگاہ متاثر ہونے کا امکان ہے، جس کی وجہ سے موٹر ویز اور ہائی ویز پر ٹریفک متاثر ہو سکتی ہے۔
پی ڈی ایم اے نے عوام کو ہدایت کی ہے کہ وہ بارش، تیز ہوا یا ژالہ باری کے دوران کمزور ڈھانچوں، کھمبوں اور بورڈز سے دور رہیں اور لینڈ سلائیڈنگ کے خطرے والے علاقوں میں غیر ضروری سفر سے اجتناب کریں۔