کراچی کے علاقے کورنگی میں بزرگ شہری حفاظتی دیوار نہ ہونے کی وجہ سے نالے میں گر کر جاں بحق ہوگیا۔
ریسکیو ذرائع کے مطابق بزرگ شہری کورنگی کبڈی گراؤنڈ کے قریب نالے میں گر کر جاں بحق ہوا، بزرگ شہری اندھیرے میں اپنی سائیکل پر سامان لاد کر پیدل چلتے چلتے اچانک نالے میں جاگرا۔
پولیس کے مطابق جاں بحق شخص کی شناخت کالے خاں کے نام سے ہوئی ہے، متوفی زمان ٹاؤن سیکٹر 34 تھری کا رہائشی تھا۔ ابتدائی معلومات کے مطابق نالے کے اطراف حفاظتی دیوار نہ ہونے کے باعث حادثہ پیش آیا۔
متوفی کالے خاں کرائے کے مکان میں بچوں کے ہمراہ رہائش پذیر تھا، متوفی کی دو بیٹیاں اور دو بیٹے ہیں۔
علاقہ مکینوں کے مطابق نابینا اور خصوصی بچوں کے سینٹر اور اسکول کے سامنے موجود نالے کی حفاظتی دیوار نا ہونے کی متعدد بار متعلقہ اداروں کو شکایات کی گئیں تاہم اس کے باوجود اقدامات نہیں کیے گئے۔