فیلڈ مارشل سید عاصم منیر، نشانِ امتیاز (ملٹری)، ہلالِ جرأت، چیف آف آرمی اسٹاف اور چیف آف ڈیفنس فورس (COAS & CDF) نے آج نیشنل ڈیفنس یونیورسٹی (این ڈی یو)، اسلام آباد کا دورہ کیا۔ صدر این ڈی یو نے چیف آف آرمی اسٹاف و چیف آف ڈیفنس فورس کا پرتپاک استقبال کیا۔
دورے کے دوران انہیں نیشنل سیکیورٹی اینڈ وار کورس میں شریک سول و عسکری شرکاء کے پینل کی جانب سے قومی سلامتی کو درپیش چیلنجز اور ان سے نمٹنے کی حکمتِ عملی پر بریفنگ دی گئی۔
خطاب میں فیلڈ مارشل نے بدلتے ہوئے عالمی، علاقائی اور داخلی سیکیورٹی ماحول پر روشنی ڈالتے ہوئے کہا کہ ملک کو روایتی، غیر روایتی، انٹیلی جنس، سائبر، انفارمیشن، عسکری اور معاشی سمیت متعدد شعبوں میں مسلسل چیلنجز کا سامنا ہے، جن سے نمٹنے کے لیے ہمہ جہتی تیاری، مسلسل موافقت اور قومی طاقت کے تمام عناصر میں ہم آہنگی ناگزیر ہے۔
انہوں نے کہا کہ دشمن عناصر براہِ راست تصادم کے بجائے بالواسطہ اور مبہم طریقے اختیار کر رہے ہیں اور پراکسیز کے ذریعے اندرونی کمزوریوں سے فائدہ اٹھاتے ہیں۔ مستقبل کے رہنماؤں کے لیے ضروری ہے کہ وہ ایسے کثیر الجہتی اور ذہنی نوعیت کے چیلنجز کی بروقت شناخت اور مؤثر تدارک کی صلاحیت رکھتے ہوں۔
فیلڈ مارشل نے غیر یقینی حالات میں واضح فیصلے کرنے اور فکری مضبوطی کو موجودہ سیکیورٹی ماحول میں کامیابی کی کلید قرار دیا۔ انہوں نے این ڈی یو کے کردار کو سراہتے ہوئے کہا کہ پیشہ ورانہ عسکری تعلیم ادارہ جاتی صلاحیت، مقامی مہارت اور طویل المدتی قومی استحکام کے لیے بنیادی اہمیت رکھتی ہے۔
اختتام پر فیلڈ مارشل نے پینلز کے تجزیے کو سراہا اور شرکاء پر زور دیا کہ وہ دیانت، نظم و ضبط اور بے لوث خدمت کی اقدار کو برقرار رکھتے ہوئے چوکنا اور ہمہ وقت تیار رہیں۔