مظفر آباد کی یونیورسٹی آف آزاد کشمیر میں وزیراعظم شہباز شریف نے کہا کہ مئی 2025 کی جنگ میں افواج پاکستان نے ہندوستان کو وہ تاریخی سبق سکھایا جو وہ ہمیشہ یاد رکھے گا۔
وزیراعظم نے طلبا میں لیپ ٹاپ تقسیم کرنے کی تقریب سے خطاب میں کہا کہ لیپ ٹاپ کوئی مشین نہیں بلکہ یہ ایک وژن ہے، اگر لیپ ٹاپ دینا رشوت ہوتی تو کیا آج ہمارے نوجوان ڈاکٹر اور انجینئر بن سکتے تھے؟ انھوں نے کہا کہ آج تک ایک لیپ ٹاپ بھی سفارش کی بنیاد پر نہیں دیا۔
شہباز شریف نے کہا کہ آزاد کشمیر میں چار دانش اسکولوں کی تعمیر کی منظوری دی ہے، یہاں دانش یونیورسٹی بھی بنائیں گے۔
ان کا کہنا تھا مئی 2025 کی جنگ میں افواج پاکستان نے ہندوستان کو وہ سبق سکھایا جو وہ ہمیشہ یاد رکھے گا۔ انھوں نے مزید کہا کہ وہ وقت جلد آجائے گا جب کشمیر بنے گا پاکستان اور مقبوضہ کشمیر آزاد ہوگا، اتحاد اور یکجہتی کے ذریعے کشمیریوں کو اُن کا حق دلوائیں گے۔