قومی اسمبلی سیکریٹریٹ نے تمام ارکانِ قومی اسمبلی سے گزشتہ چھ ماہ کے دوران استعمال کیے گئے سفری واؤچرز کی مکمل تفصیلات طلب کرلی ہیں۔
ارکانِ قومی اسمبلی نے پہلی بار اس نوعیت کی تفصیلات مانگے جانے پر تشویش کا اظہار کرتے ہوئے معاملہ اسپیکر قومی اسمبلی ایاز صادق کے سامنے اٹھانے کا فیصلہ کیا ہے۔
رپورٹ کے مطابق ہر رکن کو سالانہ دو اقساط میں 12 سے 15 لاکھ روپے تک کے سفری واؤچرز فراہم کیے جاتے ہیں۔ ارکان کا مؤقف ہے کہ ماضی میں کبھی بھی سفری واؤچرز کے استعمال کی تفصیلات طلب نہیں کی گئیں، جس پر اب سوالات اٹھائے جا رہے ہیں۔
ذرائع کے مطابق معاملے پر آئندہ دنوں میں اسپیکر قومی اسمبلی سے مشاورت متوقع ہے۔