کراچی میں موسمِ سرما کی پہلی بارش کے بعد سردی کی شدت میں واضح اضافہ ہوگیا ہے۔ شہر کے مختلف علاقوں جن میں صدر، جیل روڈ اور اطراف شامل ہیں، پھوار اور ہلکی بارش ریکارڈ کی گئی۔ محکمہ موسمیات کے مطابق کراچی میں بارش کا سلسلہ ختم ہوگیا اور 5 جنوری سے سردی بڑھ کر سنگل ڈیجٹ میں آنے کا امکان ہے۔
محکمہ موسمیات کے ڈپٹی ڈائریکٹر کے مطابق 29 دسمبر سے مغربی ہواؤں کا سلسلہ ملک کو متاثرکر رہا ہے، مغربی ہواؤں کے اس سسٹم سے کل رات کراچی میں ہلکی بارش ہوئی۔
ٹنڈو محمد خان اور گرد ونواح میں بھی صبح سويرے موسم سرما کی ہونے والی 15 منٹ کی بارش نے انتظامیہ کی پول کھول دی، بارش ہوتے ہی شہر کی گلیاں تالاب کا منظر پیش کرنے لگیں۔
بارش سے سردی کے شدت میں اضافہ ہوگیا جبکہ بجلی بھی منقطع ہوگئی۔
انجم نذیرضیغم کے مطابق گزشتہ رات سب سے زیادہ بارش کیماڑی میں 6 ملی میٹر ریکارڈ ہوئی۔ انہوں نے بتایا کہ کراچی میں بارش کا سلسلہ اب ختم ہوگیا ہے لیکن چند مقامات پر بوندا باندی ہوسکتی ہے، 4 یا 5 جنوری سے شمالی ہوائیں چلنے سےکراچی میں سردی بڑھنےکا امکان ہے اور درجہ حرارت سنگل ڈیجٹ میں آسکتا ہے۔
دوسری جانب ملک کے مختلف حصوں میں بارش اور برف باری کا سلسلہ جاری ہے جس کے باعث سردی کی شدت میں اضافہ ہوگیا ہے۔ آزاد کشمیر کی وادی نیلم میں جاگراں، اپر نیلم، شاردہ، اڑنگ کیل، گریس اور تاوبٹ سمیت بالائی علاقوں میں ہلکی اور تیز برف باری وقفے وقفے سے جاری ہے، جبکہ برف باری کے باعث مرکزی شاہراہ نیلم اور رابطہ سڑکوں پر پھسلن میں اضافہ ہوگیا ہے۔
خیبرپختونخوا میں بارش اور برفباری کا سلسلہ گزشتہ روز سے جاری ہے، رزمک، شوال، وانا، برمل اور شکئی کے بالائی علاقوں میں بارش کے بعد برفباری جاری ہے، دیامر میں برفباری سے بالائی علاقوں کی رابطہ سڑکیں بند ہوگئیں، سوات میں گزشتہ رات سے مختلف علاقوں میں برف باری کا سلسلہ جاری ہے
ادھر بلوچستان کے مختلف علاقوں چمن، حب، وندر، پشین، زیارت اور مسلم باغ میں وقفے وقفے سے بارش کا سلسلہ جاری ہے، جبکہ کوئٹہ، گوادر اور جیونی میں بارش کے باعث ندی نالوں میں طغیانی اور نشیبی علاقے زیرِ آب آگئے ہیں۔