وفاقی وزیر داخلہ محسن نقوی چین کے دورے کے پہلے مرحلے میں شنگھائی پہنچ گئے۔ وزیر داخلہ نے شنگھائی اسپیشل پولیس فورس بیورو کا دورہ کیا جہاں چیف آف کمانڈنگ سنٹر مسٹر ژیاؤ نے ان کا خیرمقدم کیا۔
دورے کے دوران محسن نقوی کو شنگھائی اسپیشل پولیس فورس بیورو کے بارے میں تفصیلی بریفنگ دی گئی۔ وزیر داخلہ نے فورس کے زیرِ استعمال اے پی سی، بم ڈسپوزل یونٹ کے آلات، جدید اسلحہ اور جدید ترین واٹر کینن سمیت دیگر آلات کا معائنہ کیا۔ انہوں نے اسپیشل فورس کی پیشہ ورانہ مہارت اور تربیت کے عملی مظاہرے اور مارشل آرٹس کا مظاہرہ بھی دیکھا۔
محسن نقوی نے شنگھائی اسپیشل پولیس فورس کو جدید خطوط پر استوار کرنے کے نظام کو سراہتے ہوئے کہا کہ شنگھائی اسپیشل پولیس فورس اور اسلام آباد پولیس کے درمیان باہمی تعاون کو مزید مضبوط کیا جائے گا۔ انہوں نے فورس کے تربیتی معیار کو قابلِ تحسین قرار دیا۔
اس موقع پر وفاقی سیکریٹری داخلہ محمد خرم آغا، آئی جی اسلام آباد پولیس علی ناصر رضوی اور چیف کمشنر اسلام آباد محمد علی رندھاوا بھی وزیر داخلہ کے ہمراہ تھے۔