امریکی صدر ڈونلڈ ٹرمپ نے ایک بار پھر خبردار کیا ہے کہ اگر بھارت نے روسی تیل کے معاملے پر تعاون نہ کیا تو اس پر ٹیرف بڑھایا جاسکتا ہے۔
کشمیر میڈیا سروس نے خبر رساں ادارے رائٹرز کے حوالے سے بتایا کہ صدر ٹرمپ نے ایک خطاب کے دوران کہا کہ امریکا روسی تیل کے معاملے پر بھارت کے موقف اور اقدامات کا باریک بینی سے جائزہ لے رہا ہے، اگر بھارت نے اس مسئلے پر تعاون نہ کیا تو تجارتی پابندیوں، خصوصاً ٹیرف میں اضافے پر غور کیا جا سکتا ہے۔
صدر ٹرمپ کا یہ بیان ایسے وقت سامنے آیا جب امریکا اور بھارت کے درمیان تجارتی مذاکرات جاری ہیں اور دونوں ممالک معاشی تعلقات کو مزید وسعت دینے پر بات چیت کر رہے ہیں۔
واضح رہے کہ اس سے قبل بھی ڈونلڈ ٹرمپ یہ دعویٰ کرچکے ہیں کہ بھارتی وزیر اعظم نریندر مودی نے انہیں یقین دہانی کرائی تھی کہ بھارت روسی تیل کی خریداری بند کردے گا، تاہم اس دعوے پر ان کی جانب سے اب تک کوئی باضابطہ تصدیق سامنے نہیں آئی۔
امریکا پہلے ہی بھارت پر 50فیصد ٹیرف عائد کرچکا ہے۔