ملائیشیا کے سابق وزیرِ اعظم اور سو سالہ مہاتیر محمد اپنے گھر کی بالکونی سے ڈرائنگ روم جاتے ہوئے پھسل کر گر گئے جس کے بعد انہیں احتیاطی طور پر اسپتال منتقل کر دیا گیا۔
عالمی خبر رساں ادارے کے مطابق اہلِ خانہ نے فوری طور پر مہاتیر محمد کو نیشنل ہارٹ انسٹی ٹیوٹ پہنچایا جہاں ماضی میں ان کی دل کی سرجری بھی ہو چکی ہے۔ سابق وزیراعظم کے معاون صوفی یوسف نے بتایا کہ مہاتیر محمد ہوش میں ہیں اور ان کی حالت مستحکم ہے تاہم یہ کہنا قبل از وقت ہے کہ انہیں اسپتال میں داخل رکھا جائے گا یا نہیں۔
یاد رہے کہ مہاتیر محمد گزشتہ چند برسوں کے دوران مختلف طبی مسائل کا سامنا کرتے رہے ہیں۔ گزشتہ سال جولائی میں اپنی 100ویں سالگرہ کے موقع پر ایک سادہ تقریب کے بعد شدید تھکن کے باعث انہیں اسپتال میں داخل کرنا پڑا تھا۔ انہیں 1989 سے دل کے عارضے لاحق ہیں جبکہ 2007 میں بائی پاس سرجری بھی ہو چکی ہے۔
مہاتیر محمد 1981 سے 2003 تک مسلسل 22 برس ملائیشیا کے وزیرِ اعظم رہے، بعد ازاں 2018 میں دوبارہ اقتدار میں آئے اور 2020 تک اس منصب پر فائز رہے۔ یوں وہ مجموعی طور پر 24 برس وزیراعظم رہے اور اپنے دوسرے دورِ حکومت میں دنیا کے معمر ترین منتخب سربراہِ حکومت قرار پائے۔