اسلام آباد پمز اسپتال میں مبینہ غفلت کے باعث خاتون مریضہ کی ہلاکت کے معاملے کا نوٹس لیتے ہوئے اسلام آباد ہیلتھ کیئر ریگولیٹری اتھارٹی (IHRA) نے اسپتال انتظامیہ سے جواب طلب کرلیا۔
اتھارٹی نے پمز اسپتال اور شعبہ پلمونولوجی کے سربراہ ڈاکٹر اسرار کو 7 روز کے اندر تفصیلی جواب جمع کرانے کی ہدایت کی ہے۔
آئی ایچ آر اے نے واقعے کی تحقیقات کے لیے مریضہ عابدہ پروین کا مکمل میڈیکل ریکارڈ بھی پمز اسپتال سے طلب کرلیا ہے، جبکہ اسپتال کے ایگزیکٹو ڈائریکٹر کو باضابطہ نوٹس جاری کردیا گیا ہے۔
اتھارٹی کے مطابق واقعے کی مکمل چھان بین کے بعد ذمہ داروں کے خلاف قانون کے مطابق کارروائی کی جائے گی۔
اطلاعات کے مطابق مریضہ کے پھیپھڑوں کی بائیوپسی کے بجائے غلطی سے جگر کی بائیوپسی کی گئی، جس کے نتیجے میں مریضہ عابدہ پروین جانبر نہ ہو سکیں۔