چیف آف دی ایئر اسٹاف بنگلادیش ایئر فورس، ایئر چیف مارشل حسن محمود خان کی قیادت میں اعلیٰ سطح کے دفاعی وفد نے ایئر ہیڈکوارٹرز اسلام آباد میں سربراہ پاک فضائیہ، ایئر چیف مارشل ظہیر احمد بابر سدھو سے اہم ملاقات کی۔
ملاقات کے دوران دونوں فضائی افواج کے درمیان آپریشنل تعاون، تربیتی مشقوں اور ایرو اسپیس صنعت میں اشتراک بڑھانے پر تفصیلی تبادلہ خیال کیا گیا۔ بنگلادیشی وفد کی ایئر ہیڈکوارٹرز آمد پر پاک فضائیہ کے چاق و چوبند دستے نے گارڈ آف آنر پیش کیا۔
ایئر چیف مارشل ظہیر احمد بابر سدھو نے معزز مہمان کو پاک فضائیہ کی جدید صلاحیتوں اور حالیہ پیش رفت سے آگاہ کیا اور بنگلادیش ایئر فورس کے کیڈٹس اور پائلٹس کے لیے بنیادی اور اعلیٰ سطح کی تربیت کی فراہمی کی یقین دہانی کرائی۔ انہوں نے سپر مشاق تربیتی طیاروں کی فراہمی کے عمل کو تیز کرنے اور مکمل تربیتی نظام فراہم کرنے کے عزم کا بھی اظہار کیا۔
بنگلادیش ایئر فورس کے سربراہ نے پاک فضائیہ کے شاندار جنگی ریکارڈ اور پیشہ ورانہ مہارت کو سراہتے ہوئے فضائی بیڑے کی تعمیر نو، ایئر ڈیفنس نظام کو مضبوط بنانے اور ریڈار سسٹمز کے انضمام میں تعاون کی خواہش ظاہر کی۔ ملاقات میں جے ایف-17 تھنڈر طیاروں پر بھی تفصیلی گفتگو ہوئی۔
دورے کے دوران بنگلادیشی ایئر چیف نے نیشنل ایرو اسپیس سائنس اینڈ ٹیکنالوجی پارک، نیشنل آئی ایس آر اینڈ انٹیگریٹڈ ایئر آپریشنز سینٹر اور پی اے ایف سائبر کمانڈ کا بھی دورہ کیا، جہاں انہیں پاک فضائیہ کی جدید آپریشنل صلاحیتوں پر بریفنگ دی گئی۔
اعلیٰ سطح کے دفاعی وفد کا یہ دورہ پاکستان اور بنگلادیش کے درمیان دفاعی تعاون، صلاحیت سازی اور طویل المدتی تزویراتی شراکت داری کے عزم کی عکاسی کرتا ہے۔