نوید قمر کی زیر صدارت پبلک اکاؤنٹس کمیٹی کا اجلاس منعقد ہوا، جس میں ایوی ایشن ڈویژن سے متعلق مختلف آڈٹ اعتراضات کا تفصیلی جائزہ لیا گیا۔
اجلاس کے دوران ایئرپورٹ سیکیورٹی فورس کی جانب سے خلاف ضابطہ پے آرڈر اپنے پاس رکھنے کا معاملہ زیر بحث آیا۔ آڈٹ حکام نے کمیٹی کو بتایا کہ اے ایس ایف نے 1 کروڑ 20 لاکھ روپے فاؤنڈیشن کے اکاؤنٹ میں رکھے، جو قواعد و ضوابط کے خلاف ہے۔
پبلک اکاؤنٹس کمیٹی نے آڈٹ سے تصدیق کے بعد اس معاملے کو نمٹانے کی ہدایت جاری کردی۔
اجلاس میں پاکستان انٹرنیشنل ایئرلائنز کے مالی معاملات پر بھی غور کیا گیا۔ آڈٹ حکام نے انکشاف کیا کہ پی آئی اے نے مجموعی طور پر 131 ارب روپے سرکاری خزانے میں جمع نہیں کرائے۔
پی اے سی نے اس سنگین مالی بے ضابطگی پر تشویش کا اظہار کرتے ہوئے متعلقہ حکام کو وضاحت اور کارروائی کی ہدایت کی۔