وفاقی وزیرداخلہ محسن نقوی کی زیر صدارت اسلام آباد میں پانی کی قلت پر قابو پانے کے حوالے سے ایک اہم اجلاس منعقد ہوا، جس میں جڑواں شہروں میں پانی کی فراہمی بڑھانے کیلئے شارٹ ٹرم اور لانگ ٹرم اقدامات کا تفصیلی جائزہ لیا گیا۔
اجلاس میں فیصلہ کیا گیا کہ سی ڈی اے اور پنجاب حکومت کے باہمی تعاون سے اسلام آباد اور راولپنڈی کیلئے مشترکہ طور پر نئے ڈیمز تعمیر کیے جائیں گے تاکہ مستقبل میں پانی کی ضروریات کو پورا کیا جا سکے۔ اجلاس کو پانی ذخیرہ کرنے کیلئے نئے چھوٹے ڈیمز اور واٹر ریزروائرز کی تعمیر پر ہونے والی پیش رفت سے بھی آگاہ کیا گیا۔
واپڈا اور سی ڈی اے کی جانب سے پانی کی فراہمی میں اضافے کیلئے مختلف آپشنز، فزیبلٹی رپورٹس اور متوقع ٹائم لائنز پیش کی گئیں۔ اجلاس کو چراہ، دوتارہ اور شاہدرہ ڈیم منصوبوں پر جامع بریفنگ دی گئی۔ اجلاس میں فیصلہ کیا گیا کہ 110 ایم ڈی جی اسٹوریج کا حامل دوتارہ ڈیم دو سال میں مکمل کیا جائے گا۔
اجلاس میں اسلام آباد میں پانی کی فراہمی کے موجودہ نظام میں موجود خامیوں کو دور کرنے، واٹر ڈسٹری بیوشن نیٹ ورک میں بہتری اور مؤثر ترسیل کیلئے جدید اور مربوط نظام اپنانے پر زور دیا گیا۔
وفاقی وزیرداخلہ محسن نقوی نے پانی کے منصوبوں کو آن گراؤنڈ لانے کیلئے متعلقہ امور تیزی سے طے کرنے کی ہدایت کی اور جامع روڈ میپ دس روز میں طلب کر لیا۔ انہوں نے پانی کی چوری اور غیرقانونی کنکشنز کے غلط استعمال کے خلاف سخت کریک ڈاؤن کا حکم بھی دیا۔
محسن نقوی کا کہنا تھا کہ اسلام آباد کے شہریوں کیلئے پانی کی فراہمی حکومت کی اولین ترجیح ہے، قلیل مدتی پلان کے تحت تمام دستیاب وسائل بروئے کار لاتے ہوئے پانی کی فراہمی کو یقینی بنایا جائے گا، جبکہ شہریوں کو فوری اور مؤثر ریلیف فراہم کیا جائے گا۔
اجلاس میں وزیر مملکت داخلہ طلال چوہدری، وزیراعظم کے مشیر سید توقیر شاہ، سیکرٹری داخلہ، ایڈیشنل سیکرٹری داخلہ، چیئرمین سی ڈی اے، کمشنر راولپنڈی، سی ڈی اے کے ممبران اور دیگر اعلیٰ حکام نے شرکت کی۔