بنگلادیش کے بعد عراق نے بھی پاکستان کے جدید جے ایف-17 تھنڈر لڑاکا طیاروں کی ممکنہ خریداری میں دلچسپی ظاہر کردی ہے۔
پاک فوج کے شعبہ تعلقات عامہ (آئی ایس پی آر) کے مطابق سربراہ پاک فضائیہ ائیر چیف مارشل ظہیر احمد بابر سدھو ان دنوں عراق کے سرکاری دورے پر ہیں۔
عراقی فضائیہ کے ہیڈکوارٹر پہنچنے پر ائیر چیف مارشل ظہیر احمد بابر سدھو کا تاریخی اور شاندار استقبال کیا گیا، جہاں عراقی فضائیہ کے چاق و چوبند دستے نے انہیں گارڈ آف آنر پیش کیا۔
آئی ایس پی آر کے مطابق پاک فضائیہ کے سربراہ نے کمانڈر عراقی فضائیہ لیفٹیننٹ جنرل اسٹاف پائلٹ مہند غالب محمد راضی الاسدی سے ملاقات کی، جس میں دو طرفہ عسکری تعاون، پیشہ ورانہ امور اور مشترکہ دلچسپی کے مختلف پہلوؤں پر تفصیلی تبادلہ خیال کیا گیا۔
ملاقات میں مشترکہ تربیت، صلاحیتوں میں اضافے، ایوی ایشن انڈسٹری میں تعاون اور دونوں فضائی افواج کے درمیان عملی ہم آہنگی کے فروغ پر بات چیت کی گئی۔ ائیر چیف نے پاکستان اور عراق کے درمیان گہرے مذہبی، ثقافتی اور تاریخی روابط کو اجاگر کرتے ہوئے انہیں دونوں ممالک اور ان کی مسلح افواج کے دیرپا تعلقات کی مضبوط بنیاد قرار دیا۔
سربراہ پاک فضائیہ نے تربیت اور مشترکہ صلاحیتوں میں اضافے کے شعبوں میں عراقی فضائیہ کو مکمل معاونت فراہم کرنے کے عزم کا اعادہ کیا۔ ملاقات میں باہمی آپریشنل ہم آہنگی کو مزید مضبوط بنانے کے لیے مشترکہ مشقوں اور تربیتی پروگرامز کے انعقاد پر بھی اتفاق کیا گیا۔
عراقی فضائیہ کے کمانڈر نے پاک فضائیہ کے پائلٹس کے ایکسچینج پروگرام میں گہری دلچسپی ظاہر کی اور جے ایف-17 تھنڈر لڑاکا طیاروں کی ممکنہ خریداری کے ساتھ ساتھ سپر مشاق تربیتی طیاروں کی شمولیت اور جامع دیکھ بھال و لائف سائیکل سپورٹ میں بھی دلچسپی کا اظہار کیا۔
عراقی ائیر چیف نے خطے میں استحکام کے لیے پاکستان کے تعمیری کردار کو سراہتے ہوئے باہمی تزویراتی دلچسپی کے شعبوں میں تعاون بڑھانے کی خواہش کا اظہار کیا۔
واضح رہے کہ اس سے قبل بنگلادیش کے ائیر چیف بھی پاک فضائیہ کے سربراہ سے ملاقات کر چکے ہیں، جس میں جے ایف-17 تھنڈر طیاروں کی ممکنہ خریداری پر بات چیت کی گئی تھی۔