وزیراعظم محمد شہباز شریف کی زیر صدارت وفاقی کابینہ کا اجلاس آج وزیراعظم ہاؤس میں منعقد ہوا۔
اجلاس میں وزارت خزانہ کی جانب سے اسٹیٹ بینک آف پاکستان کے نئے کرنسی نوٹوں کے ڈیزائن کے حوالے سے بریفنگ دی گئی۔ بتایا گیا کہ نئے نوٹ جدید عالمی معیار اور عصری تقاضوں کے مطابق ڈیزائن کیے جا رہے ہیں اور اس مقصد کے لیے بین الاقوامی ماہرین کی خدمات حاصل کی گئی ہیں۔
وفاقی کابینہ نے نئے کرنسی نوٹوں کے ڈیزائن پر غور و خوض کے لیے خصوصی کابینہ کمیٹی تشکیل دینے کی منظوری دی۔
اسی طرح وفاقی کابینہ نے وزارت مذہبی امور و بین المذاہب ہم آہنگی کی جانب سے پیش کی گئی پرائیویٹ حج پالیسی 2027-2030 کا مسودہ بھی زیر غور لایا۔
کابینہ نے ہدایت دی کہ پرائیویٹ حج آپریٹرز کمپنیز کی تھرڈ پارٹی رجسٹریشن اور جانچ کے حوالے سے مسودے پر حج پالیسی کمیٹی مزید غور کرے اور تجاویز پیش کرے۔
وفاقی کابینہ نے کابینہ کمیٹی برائے توانائی کے 24 دسمبر 2025 اور اقتصادی رابطہ کمیٹی کے 23 دسمبر 2025 کے اجلاس میں کیے گئے فیصلوں کی توثیق بھی کی۔