الیکشن کمیشن نے حکومت کو سفارشات بھیجی ہیں کہ وہ بلدیاتی انتخابات کے بروقت انعقاد کو یقینی بنانے کے لیے متعلقہ قوانین میں ترمیم کرے۔
الیکشن کمیشن کے مطابق، مقامی حکومتیں ملکی جمہوری نظام کا اہم ستون ہیں جو مقامی سطح پر عوام کو سہولیات فراہم کرتی ہیں اور ان کے مسائل حل کرتی ہیں۔ اس بات کو قومی اہمیت کا مسئلہ سمجھتے ہوئے، الیکشن کمیشن نے الیکشنز ایکٹ 2017 کے سیکشن 219 میں ترمیم کی سفارش کی ہے۔
سفارش میں کہا گیا ہے کہ مقامی حکومتوں کی میعاد ختم ہونے یا تحلیل ہونے کی صورت میں، موجودہ لوکل گورنمنٹ قوانین کے تحت انتخابات کرائے جائیں۔
الیکشن کمیشن کا یہ اقدام اس لیے بھی ضروری قرار دیا گیا ہے کہ بعض حکومتیں بلدیاتی انتخابات کو بروقت کروانے میں دلچسپی نہیں رکھتیں۔
الیکشن کمیشن نے واضح کیا کہ بلدیاتی انتخابات کا انعقاد وفاقی اور صوبائی حکومتوں کے ساتھ ساتھ الیکشن کمیشن کی مشترکہ ذمہ داری ہے۔