وزیراعلیٰ خیبر پختونخوا سہیل آفریدی نے کہا ہے کہ عوام کو جبری طور پر گھروں سے بے دخل کیا جا رہا ہے۔ انہوں نے کہا کہ دو ماہ کی مدت کے فیصلے سمیت کسی بھی معاملے پر صوبائی حکومت سے مشاورت نہیں کی گئی۔
ضلع خیبر کی تحصیل باڑہ میں تیرہ متاثرین کے لیے قائم رجسٹریشن سینٹر کے دورے کے موقع پر وزیراعلیٰ نے کہا کہ متاثرین کو تمام ممکن سہولیات کی فراہمی ہر صورت یقینی بنائی جائے گی۔ انہوں نے کہا کہ قبائلی عوام نے تنخواہ کے بغیر 70 سال تک سرحدوں کی حفاظت کی مگر ریاست نے قبائلی عوام سے کیے گئے وعدے پورے نہیں کیے۔
سہیل آفریدی نے کہا کہ قبائلی اضلاع کوئی تجربہ گاہ نہیں، ہر حکومت آ کر نئی پالیسی آزمانا چاہتی ہے یہ ناکام پالیسی کل بھی ناکام تھی اور آئندہ بھی ناکام رہے گی۔ کسی بھی صورت اس ناکام پالیسی کا حصہ نہیں بنیں گے عوامی حمایت کے بغیر کوئی بھی پالیسی کامیاب نہیں ہو سکتی۔
انہوں نے کہا کہ پاکستان کی تاریخ میں پہلی بار قبائلی ضلع سے وزیراعلیٰ منتخب ہوا ہے کچھ لوگوں کو یہ حقیقت قبول نہیں، اسی لیے قبائلی وزیراعلیٰ کو نشانہ بنایا جا رہا ہے۔ میرے وزیراعلیٰ نامزد ہونے کے بعد مسلسل منفی پروپیگنڈا کیا جا رہا ہے ناکام پالیسیوں پر تنقید کرنے پر مجھے دہشت گردوں کا حمایتی کہا جاتا ہے۔
وزیراعلیٰ نے کہا کہ مجھے ٹارگٹ کرنے کے لیے میرے علاقے کے عوام کو بے گھر کیا جا رہا ہے۔ انہوں نے کہا کہ ہم نے اپنی عورتوں اور بزرگوں کی بے حرمتی اپنی آنکھوں سے دیکھی ہے ہم بندوقوں کا مقابلہ قلم اور شعور سے کریں گے ہم اپنے بچوں کو بندوق نہیں بلکہ قلم اور تعلیم دیں گے۔سہیل آفریدی نے مزید کہا کہ خون کے آخری قطرے تک آئینی حدود میں اپنی جنگ جاری رکھیں گے۔