وزیراعظم محمد شہباز شریف نے عالمی اقتصادی فورم کے 56 ویں سالانہ اجلاس کے موقع پر سوئٹزرلینڈ کے شہر ڈیووس میں انٹرنیشنل مانیٹری فنڈ (آئی ایم ایف) کی منیجنگ ڈائریکٹر کرسٹالینا جارجیوا سے ملاقات کی۔
ملاقات کے دوران وزیراعظم نے منیجنگ ڈائریکٹر کو پاکستان کے میکرو اکنامک اشاریوں میں بہتری، معاشی استحکام کے لیے کی جانے والی کوششوں اور ادارہ جاتی اصلاحات میں پیش رفت سے آگاہ کیا۔ انہوں نے مالیاتی نظم و ضبط، محصولات میں اضافے اور پائیدار اقتصادی ترقی کے لیے حکومت پاکستان کے عزم پر زور دیا۔
آئی ایم ایف کی منیجنگ ڈائریکٹر کرسٹالینا جارجیوا نے پاکستان کی اصلاحاتی کوششوں کو سراہا اور طویل مدتی معاشی لچک کے حصول کے لیے اصلاحات کے تسلسل کی اہمیت پر زور دیا۔ ملاقات میں عالمی اقتصادی صورتحال، ابھرتی ہوئی معیشتوں کو درپیش چیلنجز اور معاشی استحکام کے لیے کثیرالجہتی تعاون پر بھی تبادلہ خیال کیا گیا۔
ملاقات میں نائب وزیراعظم و وزیر خارجہ اسحاق ڈار، وفاقی وزیر اقتصادی امور احد خان چیمہ، وفاقی وزیر خزانہ و محصولات محمد اورنگزیب اور وفاقی وزیر اطلاعات و نشریات عطاء اللہ تارڑ بھی موجود تھے۔