نائب وزیرِ اعظم اور وزیرِ خارجہ سینیٹر محمد اسحاق ڈار نے ورلڈ اکنامک فورم 2026 کے موقع پر تھائی لینڈ کے وزیرِ خارجہ سہاسک پھوانگ کِیاؤ سے سائیڈ لائن ملاقات کی، جس میں دونوں ممالک کے درمیان دوطرفہ تعلقات کے فروغ پر اتفاق کیا گیا۔
ملاقات کے دوران پاکستان اور تھائی لینڈ کے دوطرفہ تعلقات کا جامع جائزہ لیا گیا اور اقتصادی، تجارتی، سرمایہ کاری اور زرعی شعبوں میں تعاون بڑھانے کے عزم کا اعادہ کیا گیا۔ دونوں رہنماؤں نے اس بات پر زور دیا کہ باہمی تجارت اور سرمایہ کاری کے مواقع کو مزید وسعت دے کر تعلقات کو نئی بلندیوں تک لے جایا جا سکتا ہے۔
دونوں وزرائے خارجہ نے علاقائی اور عالمی صورتحال پر بھی تبادلۂ خیال کیا اور باہمی دلچسپی کے امور پر تعاون جاری رکھنے پر اتفاق کیا۔
اس موقع پر پاکستان اور تھائی لینڈ کے درمیان سفارتی تعلقات کے قیام کے 75 سال مکمل ہونے پر ایک دوسرے کو مبارکباد بھی دی گئی اور اس تاریخی سنگِ میل کو دوطرفہ دوستی اور شراکت داری کے استحکام کی علامت قرار دیا گیا۔