ڈپٹی کمشنر ساؤتھ جاوید نبی کھوسو کے مطابق ریسکیو ٹیموں نے گل پلازہ کا ملبہ بڑی حد تک ہٹا دیا ہے تاہم اب بھی 10 سے 11 افراد لاپتہ ہیں جن کی تلاش کے لیے آپریشن جاری ہے۔
ذرائع کا کہنا ہے کہ سرچ آپریشن کے دوران عمارت کے ملبے سے 4 ڈی وی آر برآمد ہوئے ہیں، جن سے سانحے کی وجوہات جاننے میں اہم شواہد ملنے کا امکان ہے۔
ملبہ اٹھانے کے دوران ڈیڑھ کلو سونا بھی ملا جو متعلقہ دکان کے مالک کے حوالے کر دیا گیا، جبکہ تہہ خانے میں واقع ایک دکان سے ایک لاکھ روپے سے زائد رقم بھی برآمد ہوئی جسے مالک کو واپس کر دیا گیا ہے۔
ادھر پولیس سرجن ڈاکٹر سمیعہ طارق نے بتایا کہ گل پلازہ سے اب تک 71 لاشیں اور انسانی باقیات لائی جا چکی ہیں۔ ان کا کہنا تھا کہ لاشیں شدید حد تک جل جانے کے باعث ڈی این اے کے ذریعے شناخت کا عمل پیچیدہ ہو گیا ہے۔
حکام کے مطابق 71 جاں بحق افراد میں سے اب تک 20 لاشوں کی ظاہری شناخت کی جا چکی ہے جبکہ 13 کی شناخت ڈی این اے کے ذریعے کی گئی ہے۔ دوسری جانب لاپتہ افراد کی فہرست میں اب بھی 82 افراد کے نام شامل ہیں، جن کی تلاش جاری ہے۔