کراچی میں سرد موسم کی شدت میں اضافہ ریکارڈ کیا گیا ہے اور شہر میں کم سے کم درجہ حرارت 8.5 ڈگری سینٹی گریڈ تک گر گیا جو معمول سے 3.5 ڈگری کم ہے۔
محکمہ موسمیات کے مطابق جناح ٹرمینل اور اس کے اطراف کے علاقے سب سے زیادہ سرد رہے، جہاں درجہ حرارت 6.2 ڈگری سینٹی گریڈ تک ریکارڈ کیا گیا۔ دیگر علاقوں میں بن قاسم 8.6، گلستانِ جوہر 8.7، جبکہ شارع فیصل اور ماڑی پور میں 9.5 ڈگری سینٹی گریڈ ریکارڈ کیا گیا۔
محکمہ موسمیات نے بتایا کہ ملک کے مغربی علاقوں میں مغربی ہواؤں کا سلسلہ پیر سے بالائی علاقوں تک اثر انداز ہو سکتا ہے۔ بلوچستان میں اتوار اور پیر کو گرج چمک کے ساتھ بارش اور برفباری کا امکان ہے، جبکہ 26 جنوری کو بالائی سندھ میں گرج چمک کے ساتھ بارش متوقع ہے۔ گلگت بلتستان، کشمیر اور چترال میں پیر اور منگل کے دوران گرج چمک کے ساتھ بارش کا امکان ہے۔