وزیر دفاع خواجہ آصف نے کہا ہے کہ پاکستان کی بقا اور مضبوطی کا انحصار مؤثر بلدیاتی نظام پر ہے اور اختیارات کو نچلی سطح تک منتقل نہ کرنا عوام کے ساتھ دھوکہ ہوگا۔
لاہور میں ایک تقریب سے خطاب کرتے ہوئے خواجہ آصف نے بتایا کہ وہ گزشتہ 35 سال سے پارلیمنٹ کا حصہ ہیں، لیکن کبھی یہ احساس نہیں ہوا کہ وہ کسی مخصوص سسٹم کے حصے ہیں کیونکہ ان کے اردگرد ہمیشہ عقلمند لوگ موجود رہے۔
انہوں نے کہا کہ اٹھارویں ترمیم کے تحت اختیارات صوبوں کو منتقل تو کیے گئے لیکن عملی طور پر یہ اختیارات نچلی سطح تک نہیں پہنچے، حالانکہ حقیقی منتقلی عوامی سطح پر ہونی چاہیے تھی۔
وزیر دفاع نے مزید کہا کہ پاکستان میں مؤثر بلدیاتی نظام نافذ نہیں کیا جا سکا اور اگر اختیارات نچلی سطح تک منتقل نہ کیے گئے تو یہ عوام کے ساتھ دھوکہ ہے۔ انہوں نے اٹھارویں ترمیم کو ایک ڈھکوسلا قرار دیا جس پر کئی لوگوں نے شدید اعتراض بھی کیا۔