آغا خان یونیورسٹی میڈیکل کالج کو سنگاپور میڈیکل کونسل کی منظور شدہ غیر ملکی میڈیکل جامعات کی فہرست میں شامل کر لیا گیا ہے، یہ اعلان سنگاپور کی وزارتِ صحت کی جانب سے باضابطہ کیا گیا۔
پاکستان کی ہائی کمشنر برائے سنگاپور رابیہ شفیق نے اس پیش رفت کا خیرمقدم کرتے ہوئے کہا کہ اس فیصلے سے آغا خان یونیورسٹی کے طلبہ اور فارغ التحصیل ڈاکٹرز کو سنگاپور میں بطور رجسٹرڈ ڈاکٹر کام کرنے کے مواقع میسر آئیں گے بشرطیکہ وہ SMC کے مقررہ ضابطہ جات اور پیشہ ورانہ تقاضے پورے کریں۔
ہائی کمشنر نے سوشل میڈیا پر بیان میں اس کامیابی کو پاکستان کی میڈیکل کمیونٹی کے لیے ایک اہم سنگِ میل قرار دیا اور کہا کہ آغا خان یونیورسٹی کی شمولیت اس کے اعلیٰ تعلیمی معیار، طبی مہارت اور عالمی ساکھ کا ثبوت ہے۔ انہوں نے مزید کہا کہ یہ اقدام پاکستانی ڈاکٹروں کے لیے بین الاقوامی سطح پر نئے پیشہ ورانہ مواقع پیدا کرے گا۔
رابیہ شفیق نے نوجوان اور ابتدائی کیریئر کے ڈاکٹروں کو بھی ترغیب دی کہ وہ سنگاپور میں جدید طبی نظام، عالمی معیار کی صحت سہولیات اور بین الاقوامی تجربے سے فائدہ اٹھائیں۔