اسلام آباد میں کیپیٹل ڈیولپمنٹ اتھارٹی کے چیئرمین آفس کے باہر ہزاروں ملازمین نے تنخواہوں میں کٹوتی کے خلاف احتجاج شروع کردیا ہے۔
ملازمین کا کہنا ہے کہ تنخواہوں میں کٹوتی کا فیصلہ فوری طور پر واپس لیا جائے، بصورت دیگر احتجاج میں شدت لائی جائے گی۔ مظاہرین نے خبردار کیا ہے کہ مطالبات تسلیم نہ ہونے کی صورت میں چیئرمین سی ڈی اے کے دفتر کا گھیراؤ بھی کیا جا سکتا ہے۔
احتجاج میں شریک ملازمین قائد مزدور یونین چوہدری یاسین کی کال کے منتظر ہیں، جن کی ہدایت پر آئندہ لائحہ عمل طے کیا جائے گا۔
دوسری جانب کسی بھی ممکنہ صورتحال سے نمٹنے کے لیے پولیس کی بھاری نفری طلب کرلی گئی ہے اور سیکیورٹی کے سخت انتظامات کیے گئے ہیں۔