صدرِ مملکت نے یومِ پاکستان 23 مارچ 2026 کی مرکزی پریڈ اور اس سے منسلک تمام تقریبات نہ کرنے کی سمری کی منظوری دے دی ہے۔
ذرائع کے مطابق یہ فیصلہ جاری خلیجی تیل بحران اور حکومت کی جانب سے اختیار کیے گئے کفایت شعاری اقدامات کے تحت وزیرِ اعظم کی ایڈوائس پر کیا گیا۔
حکام کا کہنا ہے کہ یومِ پاکستان کے موقع پر منعقد ہونے والی اعزازات کی تقریب اب 28 اپریل 2026 کو منعقد کی جائے گی جبکہ دیگر تقریبات بھی محدود رکھی جائیں گی۔
ذرائع کے مطابق حکومت نے معاشی دباؤ اور اخراجات میں کمی کو مدنظر رکھتے ہوئے قومی سطح کی تقریبات کو سادہ بنانے کا فیصلہ کیا ہے تاکہ وسائل کا بہتر استعمال یقینی بنایا جا سکے۔