لاہور میں لیڈی ولنگڈن اسپتال میں سیکیورٹی گارڈ کے مریض کو اسپائنل اینستھیزیا لگانے کی ویڈیو سامنے آنے کے بعد محکمہ صحت پنجاب نے واقعے کا سخت نوٹس لے لیا ہے۔
ویڈیو میں دیکھا گیا کہ سیکیورٹی گارڈ نے مریض کو انجکشن لگایا، جس پر اسپتال انتظامیہ کی مبینہ غفلت اور حفاظتی اصولوں کی خلاف ورزی پر شدید سوالات اٹھائے گئے۔ طبی ماہرین کے مطابق اسپائنل اینستھیزیا صرف تربیت یافتہ ڈاکٹر یا اینستھیٹسٹ ہی دے سکتا ہے۔
محکمہ صحت پنجاب نے فوری کارروائی کرتے ہوئے اسپتال کے 4 سینئر کنسلٹنٹس، ایک ہیڈ نرس اور متعلقہ سیکیورٹی کمپنی کو معطل یا ختم کر دیا۔ معطل کیے گئے افسران کو پیڈا ایکٹ 2006 کی دفعہ 6 کے تحت نااہلی اور غفلت کے الزام میں اسپیشلائزڈ ہیلتھ کیئر اینڈ میڈیکل ایجوکیشن ڈپارٹمنٹ میں رپورٹ کرنے کی ہدایت کی گئی ہے۔
صوبائی وزیر صحت خواجہ سلمان رفیق نے کہا کہ اسپتالوں میں نظم و ضبط کی خلاف ورزی کی کوئی گنجائش نہیں جبکہ سیکریٹری صحت عظمت محمود نے واضح کیا کہ دوران ڈیوٹی فرائض میں کوتاہی ناقابل برداشت ہے اور مریضوں کی حفاظت اولین ترجیح ہے۔