اسلام آباد میں کاروباری شخصیت عامر اعوان کے قتل میں ملوث گروہ کو پولیس نے 24 گھنٹے سے بھی کم وقت میں خیبرپختونخوا سے گرفتار کرلیا۔
وزیر مملکت برائے داخلہ طلال چودھری نے پریس کانفرنس میں ملزمان کی گرفتاری کا اعلان کرتے ہوئے بتایا کہ ڈاکوؤں نے فارم ہاؤس پر ڈکیتی کے دوران مزاحمت پر تاجر عامر اعوان کو قتل کیا۔
اس موقع پر آئی جی اسلام آباد علی ناصر رضوی نے بتایا کہ واقعے کی تحقیقات کے لیے چھ مختلف مقامات کی جیو فینسنگ کی گئی، جس کی مدد سے ملزمان تک رسائی ممکن ہوئی۔
آئی جی اسلام آباد کے مطابق کارروائی کے دوران چارسدہ سے منصور خان ڈکیت گینگ کے سرغنہ کو گرفتار کرلیا گیا، جبکہ گروہ کے دیگر ارکان کے خلاف بھی کارروائی جاری ہے۔
پولیس حکام کا کہنا ہے کہ ملزمان سے مزید تفتیش کی جا رہی ہے تاکہ واردات کے تمام پہلوؤں کو بے نقاب کیا جا سکے۔