گرمیوں کے موسم میں ایئر کنڈیشنر کا استعمال بڑھتے ہی بجلی کے بل میں نمایاں اضافہ دیکھنے میں آتا ہے جس کی ایک بڑی وجہ اے سی کو غیر مناسب درجہ حرارت پر چلانا ہے۔ اکثر صارفین کمرہ جلد ٹھنڈا کرنے کے لیے اے سی کو 16 ڈگری سیلسیس پر سیٹ کر دیتے ہیں تاہم تکنیکی ماہرین کے مطابق یہ طریقہ نہ صرف بجلی کی کھپت بڑھاتا ہے بلکہ مشین کے کمپریسر اور دیگر پرزوں پر غیر ضروری دباؤ بھی ڈالتا ہے۔
<1p>
ماہرین کا کہنا ہے کہ اے سی کو 24 ڈگری سیلسیس پر چلانا سب سے متوازن اور مؤثر انتخاب ہے۔ اس درجہ حرارت پر کمپریسر کو کم محنت کرنا پڑتی ہے اور توانائی کی بچت بھی ممکن ہوتی ہے۔ اندازوں کے مطابق درجہ حرارت میں ہر ایک ڈگری اضافے سے تقریباً 6 فیصد تک بجلی کی بچت کی جا سکتی ہے، اس طرح 16 ڈگری کے بجائے 24 ڈگری پر اے سی چلانے سے نمایاں فرق پڑتا ہے۔
<1p>
کم درجہ حرارت پر اے سی مسلسل چلتا رہتا ہے جس سے کمپریسر پر بوجھ بڑھ جاتا ہے، توانائی زیادہ خرچ ہوتی ہے اور مشین کی عمر بھی کم ہو سکتی ہے۔ اس کے برعکس 24 ڈگری پر اے سی وقفے وقفے سے بند اور چلتا ہے جس سے کارکردگی بہتر رہتی ہے اور بجلی کی کھپت کم ہوتی ہے۔ جدید اے سی میں موجود ایکو یا سیور موڈ بھی عموماً اسی حد کے قریب درجہ حرارت برقرار رکھتا ہے جس سے یکساں کولنگ کے ساتھ بجلی کی بچت ممکن ہوتی ہے۔
<1p>
ماہرین صحت کے مطابق انسانی جسم کے لیے 24 سے 26 ڈگری سیلسیس کا درجہ حرارت زیادہ آرام دہ تصور کیا جاتا ہے۔ اس سے کم درجہ حرارت پر طویل وقت گزارنے سے سر درد، نزلہ زکام اور جوڑوں کے درد جیسی شکایات پیدا ہو سکتی ہیں۔
<1p>
بجلی کی مزید بچت کے لیے اے سی کے ساتھ ہلکی رفتار پر پنکھا چلانا مفید رہتا ہے کیونکہ اس سے ٹھنڈی ہوا پورے کمرے میں یکساں طور پر پھیلتی ہے۔
<1p>
کمرے کے دروازے اور کھڑکیاں بند رکھنا، کھڑکیوں پر موٹے پردے استعمال کرنا اور اے سی کے فلٹر باقاعدگی سے صاف کرنا بھی کولنگ کی کارکردگی بہتر بناتا ہے۔ ماہرین کے مطابق ہر دو ہفتے بعد فلٹر صاف کرنے اور سیزن کے آغاز میں مکمل سروس کروانے سے اے سی کم بجلی میں بہتر کارکردگی دیتا ہے۔
<1p>
ماہرین کا مشورہ ہے کہ اگر گرمی میں آرام کے ساتھ بجلی کا بل بھی قابو میں رکھنا مقصود ہو تو اے سی کو 24 ڈگری پر چلانے کی عادت اپنائی جائے، کیونکہ یہی درجہ حرارت صحت، توانائی کی بچت اور مشین کی بہتر کارکردگی کے لیے موزوں سمجھا جاتا ہے۔
<1p>