لیڈی ریڈنگ اسپتال پشاور میں پہلی بار جدید روبوٹک سرجری کا آغاز کر دیا گیا ہے جو میڈیکل سائنس میں جدید ترین طریقہ علاج کے طور پر جانا جاتا ہے۔
اس طریقہ علاج میں سرجری ڈاکٹرز خود کرتے ہیں لیکن انہیں جدید روبوٹک سسٹم کی مدد حاصل ہوتی ہے جس میں انتہائی باریک آلات اور ہائی ڈیفینیشن کیمرے شامل ہیں جو جسم کے اندرونی حصوں کو واضح انداز میں دکھاتے ہیں۔
ڈاکٹرز کو اس جدید ٹیکنالوجی کے استعمال کے لیے خصوصی تربیت دی گئی ہے۔ ماہرین کے مطابق روبوٹک سرجری پیچیدہ آپریشنز کو زیادہ درست اور کم وقت میں ممکن بناتی ہے اور انسانی ہاتھ سے ہونے والی معمولی غلطیوں کے امکانات بھی کم کر دیتی ہے۔
روبوٹک سرجری سے مریضوں کو کئی فوائد حاصل ہوتے ہیں جن میں کم زخم، کم خون کا ضیاع، انفیکشن کے کم امکانات اور تیز ریکوری شامل ہیں۔
اس سہولت کے آغاز کے بعد خیبرپختونخوا کے مریض اب جدید علاج کے لیے دیگر بڑے شہروں یا بیرون ملک جانے کی ضرورت نہیں محسوس کریں گے اور صوبے میں ہی جدید سرجری کی سہولت دستیاب ہوگی۔